بەرگی حەوتەم
کەسەکان بەپێی پیشە
ئامادەکردنی: لیژنهی هاوبهشی زانكۆی ههڵهبجه و ڕێكخراوی خاڵ
ئاوڕدانەوە لە ژیان و بەرهەمی پیشەوەران، هونەرمەندان، نووسەران و کەسانی دیکە کە خزمەتیان بە کۆمەڵگا کردووە.
بەرگی حەوتەم
ئامادەکردنی: لیژنهی هاوبهشی زانكۆی ههڵهبجه و ڕێكخراوی خاڵ
ئاوڕدانەوە لە ژیان و بەرهەمی پیشەوەران، هونەرمەندان، نووسەران و کەسانی دیکە کە خزمەتیان بە کۆمەڵگا کردووە.
ناوی (بەختیار حەمەعەلی)یە. بە (بەختیار هەڵەبجەیی) ناسراوە. ساڵی ١٩٧٠ لە شاری هەڵەبجە لەدایکبووە. خاوەنی چوار پێشانگای تایبەتییە و لە نزیکەی ١٣٠ پێشانگای هاوبەش لە ناوەوە و دەرەوەی وڵاتدا بەشداریکردووە. جگە لەناو عێراق، کە نزیکەی ٥٠ پەیکەری لە شار و شارۆچکەکاندا خراوەتە ڕوو، لە هەریەک لە وڵاتانی ئێران و تورکیاش چەند پەیکەرێکی دانراوە. بەشداری سەرجەم فیستیڤاڵەکانی هەڵەبجەی شەهیدی کردووە. خاوەنی زۆرترین پەیکەرە بۆ مەرگەساتی بەناو ئەنفال و لە زۆربەی چالاکییەکانی تایبەت بەو یادە بەشداریکردووە. لە ئێستادا فەرمانبەرە لە وەزارەتی ڕۆشنبیریی و وەک بەڕێوەبەری پێشکەوتوو بەردەوامە.
ناوی (بەرزان زاهیر محەممەد ئەمین)ـە و بە (بەرزان شازە) ناسراوە. ساڵی ١٩٧١ له گوندی (شیرەمەڕ) لەدایکبووه. له ئۆردوگای دەربەند دزڵی دەستی بەکاری هونەری کردووه. یەکەم کاری پەیکەرتاشی (پەیکەری حەزرەتی مەریەم) بووه لە سلێمانی. لەوڵاتی ئێران شەش پەیکەری به ناوەکانی (فیردەوسی شاعیر، ئیبن عەلی سینا، میرزا کوچەکخان، ئەمیر کەبیر، ڕۆستەمی زاڵ، سوهرابی) دروستکردووە لە شاری تاران و شارەکانی تر دانراون. لەسەر داوای شارەوانیی ئەستەنبوڵ سێ پەیکەری له بەردی مەڕمەڕ دوستکردووە. پەیکەری (محەممەد جەواهیری، پادشای لۆلۆیی، هەرسێ شاعیری نالی و سالم و کوردی، ١٥ ئاژەڵە کێوی، سونبولی ڕاپەڕین، مەولەوی، عوسمان هەورامی، مەحموودخانی دزڵی، گۆران، حەمەپاشای جاف) لە نموونەی کارەکانی ئەون و لە شار و شارۆچکەکانی هەرێم دانراون. دوو پەیکەری لە وڵاتی بەریتانیا دانراون. خاوەنی دەیان خەڵاتی ناوخۆیی و نێودەوڵەتییە. چوار پێشانگای تایبەتی کردووەتەوە و لە ٨٩ پێشانگای هاوبەشیشدا بەشداریکردووە. ژیانی هاوسەریی پێکهێناوە و خاوەنی چوار منداڵە. لە ئێستادا لە وڵاتی بەریتانیا دەژی.
ناوی (حامید ئەحمەد سادق حەمەئەمین)ـە. ساڵی ١٩٨٠ لە شاری هەڵەبجە لەدایکبووە. کۆلێژی هونەری لە زانکۆی سلێمانی و ماستەری لە زانکۆی تاران تەواوکردووە. لە دەیان پێشانگا و پڕۆژەی هونەری هاوبەشدا بەشداربووە، لەوانە: پێشانگای شێوەکارانی هەڵەبجە چەند ساڵێک، ١٨ شێوەکاری هەڵەبجە لە مۆزەخانەی سلێمانی، بەرەنگاربوونەوەی توندوتیژی دژ بە ژنان، شێوەکارانی پارێزگاکان، ئەنفال لە یادکردنەوە بۆ بیرلێکردنەوە، فیستیڤاڵەکانی پەیمانگای هونەرەجوانەکان، هاوخەمی هەڵەبجە بۆ ئەنفال، دیکۆمێنت و فۆتۆگراف. دروستکەری پەیکەری دانیاڵ میتێرانە، کە لە باخچەی شارەوانیی هەڵەبجەدایە. ژیانی هاوسەریی پێکهێناوە و خاوەنی دوو منداڵە. لە ئێستادا مامۆستای هونەرە لە پەیمانگای هونەرەجوانەکانی هەڵەبجه.
پەیکەرساز و شێوەکار و نووسەر و پەرلەمانتارە. ساڵی ١٩٤٥ لە کەلاری کۆن لەدایکبووە. لە کەلار و خانەقین و بەغدا خویندوویەتی. لە تاران ماستەری لە ئەندازیاری تەلارسازی وەرگرتووە. چەند بڕوانامەی فەخری لە زانکۆکانی دەرەوەی عێراق پێبەخشراوە. پارێزەری دەیان سەرچاوەو دەستنووس و بەڵگەیە، کە خۆی دەستیخستوون و کۆی کردوونەتەوە. سەدان بەرهەمی لە کتێب و پەیکەری هەیە. کە هەندێک لە بەرهەمەکانی پەیوەندیان بە هەڵەبجەوە هەیە. لەوانە: (مێژووی هۆزی جاف، پاشایان کوشت). هەروەها پەیکەری (سیمبۆلی هەڵەبجە) کە لە پێنج بۆمب دروستیکردووە و لە دەستەچەپی دەروازەی مۆنۆمێنتيێ هەڵەبجە دانراوە. خێزاندارەو لە هەولێر نیشتەجێیە.
ساڵی ١٩٦٥ لە شاری سلێمانی لەدایکبووە. دەرچووی بەشی پەیکەرسازی پەیمانگای هونەرەجوانەکانە لە سلێمانی. ساڵی ١٩٨٦ یەکەم پەیکەری دروستکردووە و لە دۆڵی جافایەتی ژێر دەسەڵاتی پێشمەرگەدا دانراوە. ساڵی ١٩٩١ پڕۆژەی پەیکەرسازانی کوردی دامەزراندووە، ساڵی ١٩٩٤ بە هاوکاریی منداڵپارێز (پڕۆژەی سیرامیک) و ساڵی ١٩٩٥ بە هاوکاری هێرۆ ئیبراهیم ئەحمەد (گەلەری زاموا) و ساڵی ١٩٩٦ بە هاوکاری دەستەیەک گەلەری (ئەربیللا)ی دامەزراندووە. چەند ساڵێک لە ناوەندی ڕاگەیاندنی خاک وەک میدیاکار کاریکردووە و لە دەستەی دامەزرێنەرانی تەلەفزیۆنی خاک بووە. بەڕێوەبەری نوسین و بەڕێوەبەری هونەریی گۆڤاری خاک بووە. ماوەی شەش مانگ بەڕێوەبەری هونەری شێوەکاری سلێمانی بووە. ٢٠٠٢ بۆ ٢٠١٢ مامۆستای وانەبێژ بووە لە کۆلێژی هونەری زانکۆی سلێمانی. بەشداری دەیان پێشانگای هاوبەشی کردووە. ژمارەیەک پەیکەری لە شارەکانی کوردستان دانراوە. لەوانە پەیکەری (عومەری خاوەر) لە حەوشەی مۆنۆمێنتی هەڵەبجە، عادیلەخان لە باخی گشتی، پەیکەری نزا لە حەوشەی گۆڕە ڕەمزەییەکانی هەڵەبجە، کە ساڵی ٢٠٠٥ پەردەی لەسەر لادراوە. ژیانی هاوسەریی پێکهێناوە و خاوەنی سێ منداڵە. لە ئێستادا سەرپەرشتیاری گروپی پەیکەرسازانی کوردستانە.
خۆشنوس و پەیکەرسازە. بە سیروان هەڵەبجەیی ناسراوە. ساڵی ١٩٧٠ لە شاری هەڵەبجە لەدایکبووە. بەشی شێوەکاری لە پەیمانگای هونەرەجوانەکان لە سلێمانی تەواوکردووە. بە سەرپەرشتی هونەرمەند دارا حەمەسەعید بەشداری لە پەیکەری مەولەوی و پیرەمێرد لە دیواربەندی بەردەرکی سەرای سلێمانیدا کردووە. ساڵی ١٩٨٨ لەگەڵ (کۆسار ئەحمەد غوڵام، ئەیوب عیزەت، عەبدولڕەحمان محەممەد)دا بەشداری لە دروستکردنی پەیکەری (پێنج ئەسپ) وەک ڕەمزی پێنج هەزار شەهیدی هەڵەبجەدا کردووە. خاوەنی چەندین پەیکەری دانراوە لە شاری هەڵەبجە. لەوانە (عومەری خاوەر، کوردی ئاشتی خواز، ئاوارە بوون). بەشداری زۆربەی فیستیڤاڵەکانی هەڵەبجەی کردووە. لە ١١ پێشانگای هاوبەشدا بەشداریکردووە. ساڵی ١٩٩٣ پێشانگای تایبەتی خۆی لە هەڵەبجە کردووەتەوە. ئەندامی کارای سەندیکای هونەرمەندانی کوردستانە. ژیانی هاوسەریی پێکهێناوە و خاوەنی سێ منداڵە.
ساڵی ١٩٦٧ لە سلێمانی لەدایکبووە. بەشی پەیکەرسازی لە پەیمانگای هونەرەجوانەکان لە سلێمانی خوێندووە. ساڵی ١٩٩١ بەکالۆریۆسی لە هونەری پەیکەرسازی ئەکادیمیای هونەری زانکۆی بەغداد بەدەستهێناوە و ماستەری لە هونەری شێوەکاری لە ستۆکهۆڵم وەرگرتووە. سەرەتای کاری هونەری لە هەڵەبجەوە بە دروستکردنی پەیکەری ڕوناکیی شار(تۆفیقی کارەبا) لەگەڵ هونەرمەند (کۆسار ئەحمەد غوڵام)دا بووە. چەند پەیکەرێکی لە شاری سلێمانی و هەولێر دانراون. کۆمەڵێک کاری مێژوویی لە ئەوروپا دروستکردووە و لە گۆڕەپان و شوێنە گشتییەکاندا دانراون. بەشێوەیەکی تەعبیری و تراجیدی لە ئەڵمانیا پەیکەرێکی بۆ شەهید (عومەری خاوەر) دروستکردووە و بە برۆنز و ئەلەمنیۆم دایڕشتووە لە پێشانگاکانی سلێمانی و هەولێر نمایشیکردوون و خەڵاتی لەسەر وەرگرتوون. ئەندامی سەندیکای هونەرمەندانی ئەڵمانیا و هونەرمەندانی مەلەکی سوید و هونەرمەندانی هەرێمی مالمۆ و سەندیکای پەیکەرسازانی جیهانییە. ژیانی هاوسەریی پێکهێناوە و خاوەنی دوو منداڵە. بێجگە لە زمانی کوردی، عەرەبی و ئەڵمانی و سویدی دەزانێت. لە ئێستادا لە وڵاتی سوید دەژی.
ناوی (عومەر جەمیل حەمەوەیس)ـە. ساڵی ١٩٨٥ لەدایکبووە. خەڵکی گوندی (دەرەیمەڕ)ی هەورامانە. پەیمانگای هونەرەجوانەکانی سلێمانی تەواوکردووە و بووە بە مامۆستا و تا ئێستا بەردەوامە. ژیانی هاوسەریی پێکهێناوە و خاوەنی دوو منداڵە. یەکەم کاری دروستکردنی پەیکەر (سەعید قەزاز) بووە بە هاوبەشی لە ساڵی ٢٠١٠. تا ئێستا زیاتر لە ٥۰ پەیکەری بۆ ناودارانی کورد لە شارەکانی سلێمانی: هەولێر، هەڵەبجە، کەرکوک، ڕاپەڕین دروستکردووە. لەوانە پەیکەری پیرەمێرد، دوازدە سوارە، دکتۆر مستەفا زەڵمی، عوسمان هەورامی، کەمال هەورامی، شێخ قاردی ئەنجومەن. بەشداری چەندین پێشانگا و چالاکی هونەری کردووە، لەوانە: پێشانگای هاوبەشی هونەرمەندانی سلێمانی، سۆپۆزیۆمی هونەمەندانی ئەوروپا و ڕۆژهەڵاتی ناوەڕاست.
ناوی (فوئاد عەبدوڵا فەتحوڵڵا)یە. ساڵی ١٩٨٤ لە شاری هەڵەبجە لەدایکبووە. قۆناغی خوێندنی سەرەتایی و ناوەندی لە هەڵەبجەی تازە خوێندووە. بەشی پەیکەرسازی پەیمانگای هونەرەجوانەکانی سلێمانی تەواوکردووە. بەشداری لە ٣٠ پێشانگای هاوبەشی شێوەکاری کردووە و چەندین کاری پەیکەسازی ئەنجامداوە. لەوانە: ژنەجووی کورد لە هەولێر، پۆرترێتی ئەکرەم میوزیک، پەیکەری شەهید عەبدولڕەحمان میرزا حەسەن و هۆشیار بیاوێڵەیی لە هەڵەبجە. خەڵاتی یەکەمی پەیکەری لەسەر ئاستی کوردستان بۆ پەیکـەری ئاسـۆی عومەرسـوارە بەدەستهێناوە.
ساڵی ١٩٧٠ لە شاری هەڵەبجە لەدایکبووە. خوێندنی بنەڕەتی لە هەڵەبجە و بەشی شێوەکاری پەیمانگای هونەرەجوانەکان/بەشی پەیکەرسازی لە سلێمانی تەواوکردووە. بەشداری پێنج پێشانگای کردووە. خاوەنی زیاتر لە ١٥ پەیکەرە. خاوەنی یەکەمین کاری هونەرییە بۆ مەرگەساتی هەڵەبجە پێنج ئەسپ، ١٩٨٨، ئەنفال، ١٩٨٨، پێشمەرگەی نەناسراو ١٩٩٣، تۆفیقی کارەبا بە هاوبەشی لەگەڵ شوان کەمال ١٩٩٣... ساڵی ١٩٩٣ کۆتایی بەژیانی خۆی هێناوە.
ساڵی ١٩٨٥ لە شاری هەڵەبجە لەدایکبووە. دەرچووی پەیمانگای هونەرەجوانەکانی سلێمانی و کۆکلێژی هونەری زانکۆی سلێمانییە. بەشداری چەندین پێشانگای هاوبەشی کردووە، لەوانە ٤٦ شێوەکار، بەرەنگاربوونەوەی توندوتیژی دژی ژنان، تایبەتی مامۆستایان، پێشانگای شێوەکارانی هەڵەبجە، پەیکەری فۆتۆگرافەر (پەیکەری نەناسراو) لە حەوشەی مۆنۆمێنت لە هەڵەبجە. لە ئێستادا بۆ خوێندن لە وڵاتی ڕووسیایە.
ساڵی ١٩٨٤ لە شاری هەڵەبجە لەدایکبووە. کۆلێژی هونەر بەشی شێوەکاری لقی پەیکەرسازی زانکۆی سلێمانی تەواوکردووە. یەکەمین کاری هونەریی هێڵکاری پۆرترێتی شاعیرە کلاسیکییەکانی کورد ساڵی ١٩٩٥ـە. بەشداری چەندین پڕۆژە و پێشانگای هاوبەشی لە هەڵەبجە و شارەکانی تر کردووە، لەوانە (پێشانگای هاوبەشی کۆمەڵەی قوربانیان، گەڕانەوەی جوان، مۆنۆمێنتی بیناسوتاوەکەی سیروان، پەیکەری دایک لە چەمچەماڵ، یادەکانی هەڵەبجە، پڕۆژەی دەستی پەرلەمانتاران). چەند پەیکەری لە هەڵەبجە و هەوراماندا دانراون، لەوانە ("میرزا عەبدولقادر" و "گوێز" لە تەوێڵە، "فەخرەدین سەلیم" "حەکیمی مەلا ساڵح" و "حەسەن زیرەک" لە حەوشەی بەڕێوەبەرایەتیی ڕۆشنبیری). چەند بابەتێکی ڕەخنە و هونەریی لە گۆڤار و ڕۆژنامەکاندا بڵاوکردووەتەوە. سەرپەرشتیاری پڕۆژەی پێشانگای جواننوسی بۆ فەرموودە پەروەردەییەکان دەربارەی ئافرەت لە ڕۆژی ٨ی مارسی ٢٠٢٢. ژیانی هاوسەریی پێکهێناوە و خاوەنی چوار منداڵە. لە ئێستا سەرۆکی بەشی شێوەکارییە لە پەیمانگای هونەرەجوانەکان لە هەڵەبجە.
ساڵی ١٩٨٤ لە شاری هەڵەبجە لەدایکبووە. قۆناغی سەرەتایی تەواوکردووە. ساڵی ٢٠٠٩ بەشداری بەرنامەی کوردستاری لە تەلەفزیۆنی کوردسات کردووە. دواتر یەکەم ئەلبومی گۆرانیی خۆی بەناوی (تاج) لەسەر ئەرکی کوردسات و دواتر ئەلبومی دووەمی بەناوی (هەتادەمرم) بڵاوکردووەتەوە. بە تەنها و لەگەڵ هونەرمەندانی دیکەشدا گۆرانی هەیە. لەوانە لەگەڵ ناسری ڕەزازی، ئاڤان عوسمان، مەریوان سەفادین. لە چەندین فیستیڤاڵ لە ناوەوە و دەروەی کوردستاندا بەشداریکردووە. لەگەڵ تیپی مۆسیقای شنروێ و سلێمانی و چەند تیپی تر بەرهەمەکانی پێشکەشکردووە. ژیانی هاوسەریی پێکهێناوە و خاوەنی چوار منداڵە. پیشەی کارمەندی کۆمپانیایەکی ئەهلییە.
ناوی (ئازاد کەریم عەلی ڕەسوڵ). ساڵی ١٩٦٧ لە گوندی (شێخ هۆمەر)ی شارەزوور لەدایکبووە. تا قۆناغی ناوەندی خوێندووە. لە بواری مۆسیقا و گۆرانیدا کاریکردووە و خاوەنی چەندین بەرهەمی تۆمارکراوە. لە هۆنراوە و ئاوازوتن، ئاواز و هۆنراوەی هونەرمەندانی تر و فۆلکلۆریشی وتووە. هەندێک لەوانە: (چاوەڕوانی، کاڵێ، تا ئومێدی کە بە ژیانی پڕ لەمەینەتە لەناو خەڵکدا ناسراوە، شەوانی خەم، شەماڵ بیشەنێ، ساقی، بەلەنجە) بەشداری چەندین بەرنامەی تەلەفزیۆنی کردووە و لەگەڵ تیپەکانی شنروێ، سلێمانی، فۆلکلۆر، گروپی میوزیکی لوڕ و چەند گروپی تر بەرهەمی پێشکەشکردووە. بەرهەمی کاڵێ خەڵاتی باشترین بەرهەمی فیستیڤاڵی کوردساتی لە ٢٠٠٢ وەرگرتووە. ژیانی هاوسەریی پێکهێناوە و خاوەنی دوو منداڵە.
گۆرانیبێژ و تفەنگچییە. ناوی (ئەحمەد حەمەحسەین حەمەمراد)ە. ساڵی ١٨٩٠ لە شارۆچەی (بیارە) لەدایکبووە. سێ جار ژیانی هاوسەریی پێکهێناوە و خاوەنی نۆ منداڵە. لەگەڵ گۆرانیبێژە بە ناوبانگەکانی هەوراماندا گۆرانی چڕیووە. داهێنەری چەند بەزم و سیاچەمانەیەکە، لەوانە(با من بچمۆ قاسم خان، بەزمەکەی ئەحمەدی نازارێ). ساڵی ١٩٧٨ کۆچیدواییکردووە و لە گۆڕستانی (ملەی چنار) بەخاکسپێرراوە.
ناوی (ئەدهەم سوبحان جافر مەحموود)ە. ساڵی ١٩٦٩ لە تەوێڵە لەدایکبووە. ساڵی ١٩٨٨ پێش کیمیابارانی هەڵەبجە لە شاری بەغداد کاسێتێکی گۆرانیان لەگەڵ هونەرمەند(یونس میرزا) تۆمارکردووە. ساڵی ١٩٩١ لەگەڵ چەند هونەرمەندێک لە ئەڵقەیەکی بەرنامەی (کەشکۆڵ) لە تەوێڵە بەشداربووە. ساڵی ١٩٩٤ لەگەڵ نەجمەدین هەورامی دوو گۆرانی بۆ ڕادوێی مەریوان و گۆرانی (مەردا مەردانێ) بۆ تەلەفزیۆنی سۆسیالیست تۆمارکردووە. ساڵی ٢٠٠٣ گۆرانییەکی شێخانە بۆ تەلەفزیۆنی یەکگرتوو تۆمارکردووە. لەگەڵ هونەرمەند نەوزاد نەسروڵڵا لە سیدیەکدا ١٠ گۆرانی بڵاوکردووەتەوە. لە دیدار و بەرنامە تەلەفزیۆنییەکاندا بەشداربووە و گۆرانی وتووە. خێزاندارە و خاوەنی چوار منداڵە. لە سلێمانی دەژی و دوکانی(سەرتاشی) هەیە.
ناوی (ئەرجومەن شەوکەت عێزەت)ـە. ساڵی ١٩٧٣ لە گوندی دەگاشێخان لەدایکبووە. ساڵی ١٩٧٨ لە هەڵەبجە و پاشان لەسیروان نیشتەجێبووە. تا پۆلی سێی ناوەندی خوێندووە. ساڵی ١٩٨٦ هاتووەتە سلێمانی. مام و باوکی گۆرانیبێژو دەنگخۆش بوون. بۆیە لەسەردەستی باوکی فێری گۆرانی بووە. ساڵی ١٩٨٩ لەگەڵ سەباح و یونس میرزا و ئەدهەم هەورامی گۆرانیبێژ بووە و کاسێتی تۆمارکردووە. ساڵی ١٩٩٢ گۆرانی(چنوور و شەوبۆ) بۆ تەلەفزیۆنی گەلی کوردستان تۆماردەکات. هەمان ساڵ پەیوەندی بە تیپی میوزیکی میزۆپۆتامیاوە دەکات و بەشداری فیستیڤاڵی ئەحمەدی خانی کردووە. لەگەڵ زۆربەی گۆرانیبێژانی هەورامان گۆرانی چڕیوە و کاسێتی هەیە. سێ سیدی بڵاوکردەوتەوە. لە دەیان بەرنامەی ڕادوێیی و تەلەفزیۆنیی تایبەت بە ناوچەی هەوراماندا بەشداریکردووە. لە هەڵەبجە و کەلار کۆنسێرتی سازکردووە. ئەندامی ڕێکخراوی هونەرمەندانی کوردستان و مەڵبەندی ڕۆشنبیریی هەورامانە. ئێستا لە ژیاندایە.
ناوی (ئەرسەلان ئادەم عەبدولڕەحیم)ـە. ساڵی ١٩٨١ لە شاری هەڵەبجە لەدایکبووە. لە کۆتایی نەوەدەکانی سەدەی ڕابردووەوە دەستیکردووە بە گۆرانی وتن. لەگەڵ زۆربەی گۆرانیبێژانی هەڵەبجە و هەورامان گۆرانی وتووە، لەوانە (سەباح هەورامی، حەسەن حسێن، نەوشیروان هەورامی، فەرزاد ئەمینی، ئیسماعیل هانەگەرمڵەیی، وەهبی و یەعقوب سۆسەکانی، عادل هەورامی و... ). چەندین سیدی و کاسێت و کلیپی وێنەگیراوی هەیە. یەکەم کۆنسێرتی لەگەڵ ئاریان کەریم و هۆشیار حەمەفەرەج بووە لە هەڵەبجە. بەشداری دەیان ئاهەنگ و فیستیڤاڵی ئەدەبی و هونەری کردووە و بەرهەمی پێشکەشکردووە. وەک بێژەر لە زنار تیڤی و دێرین تیڤی بەرنامەی پێشکەشکردووە. ژیانی هاوسەریی پێکهێناوە و خاوەنی دوو منداڵە.
ناوی (جهانبەخش غەفووری)یە. ساڵی ١٩٣٥ لە گوندی (دەرەیمەڕه) لەدایکبووە. خوێندنەوە و نوسین فێربووە. لە دایکییەوه دەنگخۆشی بۆ ماوەتەوه و لە تەمەنی پازدە ساڵییەوە دەستی بە گۆرانیوتن کردووە. سەرەتا بە ژەنینی شمشاڵ و ئامێری زووڕنا و دەهۆڵ دەستیپێکردووە و دواتر بووە بە گۆرانیبیژ و بە (بەخشە) ناسراوە. ساڵی ١٩٤١ لەگەڵ خێزانەکەیدا چوونەتە(نەوسوود) و لەوێ نیشەجێبوون. چەند جارێک لەنێوان خۆرهەڵات و باشوردا کۆچ و باریان کردووە و دواتر لە (جوانڕۆ) گیرساونەتەوە. دوو جار ژیانی هاوسەریی پێکهێناوە و حەوت منداڵیان بووه. ماوەی چل ساڵ وەک گۆرانیبێژی میللی گۆرانی وتووە. لەگەڵ زۆر هونەرمەندانی تردا گۆرانییان وتووە، لەوانە (فەتحوڵڵا)، کە زۆرجار ناویان پێکەوە دێت. لەگەڵ (عوسمان هەورامی)شدا گۆرانی وتووە و کاسێتی هاوبەشیان هەیە. چەند گۆرانییەکی لە ڕادوێ وتووە. بە پلەی یەکەم سوودی لە هۆنراوەی فۆلکلۆر و دواتریش شاعیرانی کلاسیک وەرگرتووه، هەندێک جاریش پشتی بە چەند هۆنراوەکی خۆی بەستووە. پاش گۆڕینی ڕژێمی حوکمڕان لە ئێران، هاتووەتە هەڵەبجە و بۆ ماوەیەک ماوەتەوە. ساڵی ٢٠٢٢ بە دەستپێشخەری (ئەنجومەنی ئەدەبیی مەولەویی کورد) ڕێزی لێنراوە. لە ٣ی ١١ی ٢٠٢٣ کۆچیدواییکردووە.
ناوى (ئەبوبەکر عەلى محەممەد)ە. ساڵى ١٩٧٣ لەدایکبووە. ژیانی هاوسەرى پێکهێناوە و خاوەنى دوو منداڵە. قۆناغى سەرەتایى و ئامادەیی خوێندووە. لە سەرەتای ساڵانى نەوەدەکانەوە دەستى بە گۆرانیوتن کردووە و لەگەڵ هونەرمەند (عەتا زەڵمى) کاسێتێکیان تۆمارکردووە. لە دانیشتن و ئاهەنگ و زەماوەنددا بەشدارىکردووە و لەگەڵ زۆربەى هونەرمەندەکانى وەک (عوسمان هەورامى، سەباح هەورامى، عەلى گوڵپى، نەوزاد هانەدنى، عەتازەڵمى، ڕزگار گەچێنەییى، یەحیا ڕوارى، عەلى بەڵخەیى) پێکەوە گۆرانیان وتووە. دەیان کاسیەتى گۆرانیى تۆمارکراوی هەیە. چەند گۆرانییەکى تایبەت بە خۆی هەیە لەوانه: (ئازیز بزانە، هەورامانم، گریان، هاوار هى هاوار، دڵناڵانشەن).