بەرگی شەشەم
کەسەکان بەپێی پۆست
ئامادەکردنی: لیژنهی هاوبهشی زانكۆی ههڵهبجه و ڕێكخراوی خاڵ
ناساندنی کەسایەتییە دیارەکان و بەڕێوەبەران کە ڕۆڵی کاریگەریان هەبووە لە بەڕێوەبردن و پێشخستنی شاری هەڵەبجەدا.
بەرگی شەشەم
ئامادەکردنی: لیژنهی هاوبهشی زانكۆی ههڵهبجه و ڕێكخراوی خاڵ
ناساندنی کەسایەتییە دیارەکان و بەڕێوەبەران کە ڕۆڵی کاریگەریان هەبووە لە بەڕێوەبردن و پێشخستنی شاری هەڵەبجەدا.
ناوی (بورهان فەرەج محەممەد حسێن)یە و بە (بورهانی حاجی فەرەج) ناسراوە. ساڵی ١٩٦٤ لە شاری هەڵەبجە لەدایکبووە. ئامادەیی پیشەسازی لە هەڵەبجە تەواوکردووە. ساڵی ١٩٩١ بە پلەی ملازم لە بەڕێوبەرایەتیی ئاسایشی سلێمانی دامەزراوە. دواتر لە ساڵی ٢٠٠٣ پیشەکەی گواستووەتەوە بۆ شاری هەڵەبجە و وەک لێپرسراوی یاریدەدەرێتیی ئاسایشی هەڵەبجە دانراوە. دواتر کراوە بە لێپرسراوی هۆبەی لێکۆڵینەوە و ڕامیاری لە ئاسایشی شارەزوو و تا ئێستا بەردەوامە.
ساڵی ١٩٧٦ لە گوندی (پاڵانیا)ی هەورامان لەدایکبووە. بەشی کارگێڕی لە کۆلێژی کارگێڕی و ئابوری لە زانکۆی گەشەپێدانی مرۆیی تەواوکردووە. ساڵی لە ١٨ی ١٢ی ٢٠١٤ بووەتە بەڕێوەبەری ڕۆشنبیری و هونەری هەڵەبجە و ساڵی ٢٠١٦ تا ١٨ی ١١ی ٢٠٢٠ بەڕێوەبەری گشتیی ڕۆشنبیری بووە بە وەکالەت. لە ئێستا فەرمانبەرە لە بەشی ڕۆشنبیری خورماڵ. ژیانی هاوسەریی پێکهێناوە و خاوەنی پێنج منداڵە.
بەڕێوەبەری نەخۆشخانەی گشتیی هەورامانە. ساڵی ١٩٩٦ لە گوندی (خێڵی حەمە) لەدایکبووە. خوێندی سەرەتایی لە خێڵی حەمە و ناوەندی لە گۆران و ئامادەیی لە کۆلێژی هەڵەبجەی هاوبەشی نموونەی کوڕان خوێندووە. بڕوانامەی بەکالۆریۆسی لە نەشتەرگەریی گشتیی و پزیشکی لە زانکۆی سەڵاحەدین لە هەولێر به دەستهێناوە.
ساڵی ١٩٧٩ لە هەڵەبجەی شەهید لەدایکبووە، ساڵی ٢٠١٣ بڕوانامەی بەکالۆریۆسی لە زانکۆی سلێمانی بەدەستهێناوە. لە ساڵی ٢٠١٤ بڕوانامەی ماستەری لە زانکۆی (پوترا) لە وڵاتی مالیزیا بەدەستهیناوە. خاوەنی بڕوانامەی دکتۆرایە لە بواری دارایی لە زانکۆی سلێمانی. ساڵی ٢٠٢١ەوە مامۆستای زانکۆ بووە لە زانکۆکانی سلێمانی و جیهان. خاوەنی چەندین توێژینەوەی زانستیە بە زمانی ئینگلیزی و ئێستا بەڕێوەبەری گشتیی دیوانە لە وەزارەتی خوێندنی باڵا و تویژینەوەی زانستی لە هەولێر.
بەڕێوەبەرى بەڕێوەبەرایەتیى ئاوى سلێمانییە. ناوى (جەلال مستەفا نادر مەحموود)ە. ساڵى ١٩٤٨ لە گوندى (چاوگى کۆکۆیى) لەدایکبووە. قۆناغی سەرەتایی و ناوەندی لە هەڵەبجە و قۆناغی دواناوەندی و ئامادەیی لە سلێمانی خوێندووە. گەرچی لە کۆلێجی سەربازی وەرگیراوە، بەڵام بەهۆی چالاکیی سیاسیی بنەماڵەکەیەوە، دەرکراوە. لەگەڵ کردنەوەی زانکۆی سلێمانی ١٩٦٨ کۆلێجی ئەندازیاری شارستانی تەواوکردووە و بووە بە ئەندازیار. لە ناوەڕاست و خوارووی عێراق و سەرپەرشتى چەندین پڕۆژی ئاوی کردووە. ساڵانی ١٩٨٠ بۆ ١٩٩٠ کاری سەربەخۆی کردووە و هاوکات بەڕێوبەری جێبەجێکردنی هەردوو فڕۆکەخانەی (H١ و H٢)ی ئەنبار بووە. دواى ڕاپەڕین، وەک ئەندازیاری ڕاوێژکار لە ڕێکخراوی (KURDS و KSRO) بۆ ئاوەدانکردنەوەی گوند و دێهاتەکانی کوردستان و هاندانی خەڵک بۆ گەڕانەوە سەر زێدی خۆیان، کاریکردووە. لە نێوان ساڵانی ١٩٩٨ بۆ ٢٠٠٠ بووە بە بەڕێوەبەری ئاو و ئاوەڕۆی ئیدارەی سلێمانی. پاشان گەڕاوەتەوە سەر کاری تایبەتی خۆی و دواتر بووەتە ئەندامی هەڵسەنگاندنی پڕۆژەی ئاوی دوکان - سلێمانیی دوو و بە بەڕێوبەری جێبەجێکاری هەمان پڕۆژە و دواتریش بەرپرس و بەڕێوەبەری مەکتەبی ڕاوێژکاری(خەتیب و عەلەمی). کۆتا پڕۆژەشى دروستکردنی کارگەی شیشی سلێمانی ستیل و فراوانکردنی بووە. ساڵی ٢٠١٨ کۆچیدواییکردووە و لە شارى هەڵەبجە بەخاکسپێرراوە.
بەڕێوەبەرى پزیشکى دادوەریى هەڵەبجەیە. ناوى (جەمال جەمیل مستەفا نادر)ە. ساڵى ١٩٦٢ لە گوندى (چاوگ) لەدایکبووە. قۆناغی سەرەتایی لە هەڵەبجە تەواوکردووە. پەیمانگای تەندروستی لە سلێمانی خوێندووە و لە شارى کەرکوک وەک پەرستار کاریکردووە. ساڵى ١٩٨٩ بەشى پەرستارى لە شاری تاران تەواوکردووە و بۆ ماوەى چوار ساڵ لە نەخۆشخانەى قودسى پاوە دامەزراوە. ساڵى ١٩٩٢ گەڕاوەتەوە بۆ شارى هەڵەبجە و لە نەخۆشخانەى گشتیى هەڵەبجە دەستبەکاربووە. ساڵى ٢٠٠٨ بەشى یاساى لە زانکۆى سلێمانى تەواوکردووە لە ئێستادا بەڕێوبەرى پزیشکى دادوەریى هەڵەبجە.
ساڵی ١٩٨٥ لە شاری هەڵەبجە لەدایکبووە، سالی ٢٠٠٦-٢٠٠٧ بڕوانامەی ئەندازیاری لە زانکۆی دهۆک بەدەستهێناوە. ساڵی ٢٠٠٧ وەک ئەندازیاری بەڵێندەر لە گروپی کۆمپانیاکانی هەڵەبجە کاریکردوە، ساڵی ٢٠٠٩ لە شارەوانیی هەڵەبجە وەک ئەندازیارێک لە بەشی هونەری و پڕۆژەکان دامەزراوە. لە ساڵی ٢٠٠١٦ تا ٢٠٠١٩ بووە بەڕێوەبەری بەشەکەی خۆی لە شارەوانی. بەشداری چەندین خولی لەناوەوە و دەرەوەی وڵاتدا کردووە. بڕوانامەی نێودەوڵەتی لە (بەڕێوەبردنی قەیرانەکان و کارەساتە سروشتییەکان)دا لە وڵاتی ئەڵمانیا لە ساڵی ٢٠١٨دا بەدەستهێناوە. بڕوانامەی نێودەوڵەتی لە (چاکسازیی ڕێگاوبانەکان و بەڕێوەبردنی پڕۆژەکان) لە وڵاتی یابان ساڵی ٢٠١٩ بەدەستهێناوە. ساڵی ٢٠٢٢، بەڕێوەبەری نەخشەدانان بووە لە شارەوانیی هەڵەبجە. لە مانگی ١١ی ٢٠٢٣دا بووە بە بەڕێوەبەری گشتیی گەشتوگوزاری هەڵەبجە و بەردەوامە لە کارەکەی.
بەڕێوەبەری بەڕێوەبەرایەتیی هاتوچۆی هەڵەبجەیە. ساڵی ١٩٦٩ لە شارۆچکەی کفری لەدایکبووە. ئامادەیی لە شاری کفری تەواو دەکات، خاوەن بڕوانامەی بەکالۆریۆسە لە زانستی سەربازی و پلەی سەربازی عەمیدی هاتوچۆیە، لە بواری کاری پۆلیسی و پۆلیسی هاتوچۆدا خزمەتیکردووە. لە ساڵی ٢٠١٩ تا ٢٠٢٣ بەڕێوەبەری بەڕێوەبەرایەتیی پۆلیسی هاتوچۆی هەڵەبجە بووە.
بەڕێوەبەری گشتی پەروەردەی هەڵەبجە بووە. بە (حەسەنی شێخ نوری کارەبا) ناسراوە. ساڵی ١٩٥٦ لە سلێمانی لەدایکبووە. بەکالۆریۆسی لە زانستی ئیسلامی بەدەستهێناوە. یەکێک بووە لە یاریزانە دیارەکانی شار و لە تیپەکانی شۆڕش ساڵی ١٩٧١ و لە یەکگرتووی پیرمحەممەد، خەباتی سلێمانی و لە هەڵبژاردەی کۆلێج یاریکردووە، ساڵی ١٩٨١ تا ١٩٨٥ ڕاهێنەری خەباتی سلێمانی کردووە. لە ئێستادا بە پلەی بەڕێوەبەری گشتی خانەنشینە.
ڕاوێژکار بەپلەى بەڕێوەبەرى گشتى و وتەبێژى وەزارەت، بە ئەندازیار محەمەد ئەمین هەورامانى ناسراوە، لە ساڵى ١٩٥٤ لە تەوێڵە لەدایکبووە، لە ساڵى ١٩٧٢ ئامادەیى پیشەسازى بەشى کارەباى تەواوکردوە و دواتر لە زانکۆى تەکنۆلۆجى بەغدا بەکالۆریۆسى بەدەستهێناوە. خێزاندارە و خاوەنى چوارمنداڵە. ساڵى ١٩٧٧، بۆ ڕاهێنان لەسەر ئامێرى تۆرباینى بەنداوى دوکان، دەنێردرێتە (مۆسکۆ)، چەندین ساڵ وەک ئەندازیار لەو وێستگەیە کاریکردووە. لەساڵى ١٩٩١ دواى پچڕانى کارەباى هەرێم، لەگەڵ عێراق دەبێتە یەکەم بەڕێوەبەرى کۆنترۆڵى کارەباى هەرێمى کوردستان. بەشداربووە لەڕووپێویى بونیادنانى وێستگەى کارەباى خاوێن لەگوندى نەوتێ لەقەرەداغ، بەشداربووە لە بەگەڕخستنەوەى وێستگەکانى کارەبا لەبەنداوى دەربەندیخان. ١٩٩٧-٢٠٠٣ لەگەڵ بەرنامەى پەرەپێدانى نەتەوەیەکگرتوەکان کاریکردوە. یەکەم بەڕێوەبەرى هایدرۆپاوەر و وزە نوێکان بووە لە حکومەتى هەرێم. ساڵى ٢٠٠٦ بووەتە ئەندامى ئەنجومەنى ڕاوێژکارى وەزارەتى کارەباى حکومەتى هەرێم. لە ساڵى ٢٠١٠ بووەتە ڕاوێژکار لە وەزارەتى کارەباى حکومەتى هەرێم. دوو ساڵ وتەبێژی وەزارەتی کارەبا بووە. چەندین خەڵاتى نێودەوڵەتى پێبەخشراوە. ئەندامى سەندیکاى یەکێتى ئەندازیارانى کوردستانە، سەرۆکى دامەزراوەى ڕێکخراوى وزە و گەشەپێدانە بۆ پاراستنى ژینگە، ماوەى ١٢ساڵە ئەندامى ئەنجومەنى باڵاى پاراستن و چاکردنى ژینگەى هەرێمى کوردستانە. لەساڵى ٢٠١٩دا خانەنشین بووە. لە هەولێر نیشتەجێیە.
بەڕێوەبەری بەڕێوەبەراتیی کارەبای هەڵەبجە و ئەندازیاری کارەباییە. ساڵی ١٩٦٠ لەدایکبووە. بەشی کارەبای کۆلیژی ئەندازیاری، زانکۆی سەڵاحەدینی تەواوکردووە. ١٩٩٢-١٩٩٣ ئەندامی ئەنجومەنی ئاوەدانکرنەوەی هەڵەبجە بوو. لە ساڵی ١٩٩٣دا جێبەجێکاری پڕۆژەی گەیاندنی کارەبای دەربەندیخان بۆ هەڵەبجە بووە. جێبەجێکاری پڕۆژەی گەیاندنی هێڵی تەلەفۆنی سلێمانی بۆ هەڵەبجە بووە. ساڵی ١٩٩٣ وەک لێپرسراوی فەرمانگەی کارەبای هەڵەبجە دامەزراوە. سیانەی کارەبای تەوێڵە و بیارەی ساڵی ١٩٩٣، ١٩٩٤ کردووەتەوە. جێبەجێکاری گەیاندنی کارەبا بووە بۆ سیروان ١٩٩٧ و هەمان ساڵ سیانەى کردوەتەوە. ساڵی ٢٠٠٢ سیانەی کارەبای خورماڵی کردوەتەوە. لە ساڵی ٢٠٠٣دا دەبێت بە جێبەجێکاری پڕۆژەی گەیاندنی کارەبای بەرزنجە. لە دوای کردنەوەی بەڕێوەبەرایەتیی دابەشکردنی کارەبای شارەزوور لە هەڵەبجە، کارەبای گەیاندووەتە ١٠٠ گوند لە ناوچەی شارەزوور و هەڵەبجە و هەورامان. دوو بڕوانامەی لە زمانی ئینگلیزی لە زانکۆی ئەمریکی ٢٠١٣ وەرگرتووە. بڕوانامەی جیهانی لە بواری سەلامەتی و دروستیی کارکردن لە ئوردن ساڵی ٢٠١٧ وەرگرتووە. نوسەری (کتێبی هەڵەبجەی شەهید لە تاریکییەوە بۆ ڕووناکی و هەتاوێک لە شەوەزەنگدا)یە.
ساڵی ١٩٧٢ لەدایکبووە، کۆلێژی زمان، بەشی عەرەبیی خوێندووە، بەڕێوەبەری گشتییە، لە کومسیۆنی باڵای سەربەخۆی هەڵبژاردن و ڕاپرسیی کوردستان، فەرمانگەی هەڵەبجە، کاردەکات. سەرپەرشتیی ڕیفراندۆم و هەڵبژاردنەکانی خولی پێنجەمی پەرلەمانی کوردستانی لە سنوری پارێزگای هەڵەبجە کردووە. لە ڕابردوودا، وەک: یاریزان، ڕاهێنەر، دادوەر و سەرپەرشتیار و پێشکەشکار دەرکەوتووە. بۆ تیپەکانی: پەیام، هەڵبژاردەی لاوانی هەڵەبجە، قوتابيانی زەمەقی، مەبەست، ڕێناسین" ڕاستی و یانەکانی پەیام، بەختیاری، سیروانی نوێ، یاریکردووە.
خێڵان عەبدولڕەحمان مێرزا حەسەن ساڵی ١٩٨٤ لە گوندی خێڵی حەمە لەدایکبووە، پاش ڕاگواستنی گوندەکانی دەوروبەری هەڵەبجە، لە ساڵی ١٩٨٧ ڕوودەکەنە ئێران. بڕوانامەی بەکالۆریۆس لە پسپۆڕیی ئەندازیاریی تەلارسازی لە زانکۆی کۆیە وەردەگرێت، ئەندامی کارای یەکێتیی ئەندازیارانی کوردستان/ لقی سلێمانی بووە و وەک ئەندازیار لە چەندین پڕۆژەی کەرتی تایبەت و کەرتی گشتیدا کاریکردووە، لە ساڵی ٢٠١٢ وەک ئەندازیار لە سەرۆکایەتیی شارەوانیی هەڵەبجە دامەزراوە و لە بەشی نەخشەدانان وەک لێپرسراوی بەشەکە دەستبەکاربووە، دواتر لە ساڵی ٢٠٢٠ دەبێتە بەڕێوبەری گشتی لە بەڕێوەبەرایەتیی گشتیی شارەوانییەکانی هەڵەبجە و هەتا ئێستاش لە کارەکەی بەردەوامە.
بەڕێوەبەری گشتییە. ناوی (دانا حەمەشەریف سەعید ڕەحمان)ـە. ساڵی ١٩٨٣ لە شاری هەڵەبجە لەدایکبووە. خوێندنی سەرەتایی لە سلێمانی و بیارە و ناوەندی و ئامادەیی لە هەڵەبجە و بیارە خوێندووە. بەشی ئینگلیزی لە زانکۆی سلێمانی تەواوکردووە. حەوت ساڵ لە فەرماندەیی گشتی لە بەشی کارگێڕی کاریکردووە، ماوەیەکیش مامۆستای ئینگلیزی بووە لە هەڵەبجە. ساڵیکیش بەڕێوەبەری ڕاگەیاندنی پارێزگاری هەڵەبجە بووە. ژیانی هاوسەریی پێکهێناوە و خاوەنی دوو منداڵە. لە ٣١ی ٥ی ٢٠٠٢ بووەتە بەڕێوەبەری گشتیی بەڕێوەبەرایەتیی گشتیی چاودێری و گەشەپێدانی کۆمەڵایەتیی هەڵەبجە و تا ئێستا بەردەوامە.
بەڕێوەبەرى دەروازى نێودەوڵەتیى باشماخە. ساڵی ١٩٦٠ لە گوندی (چاوگ) لەدایکبووە. پەیمانگای تەکنەلۆجی لە کەرکوک و کۆلێژی یاسای لە زانکۆی سلێمانی تەواوکردووە. لە مانگی ٧ی ٢٠٠٧، کە مەرزی باشماخ بە نێودەوڵەتی کراوەتەوه، بووە بە سەرپەرشتیاری مەرزەکە و تا ساڵی ٢٠١٤ لە پۆستەکەیدا ماوەتەوە. لە ئێستادا خانەنشینە.
بەڕێوەبەری گشتییە. ساڵی ١٩٨٧ لە لە شاری هەڵەبجە لەدایکبووە. قۆناغی سەرەتایی و ناوەندی لە هەڵەبجەدا تەواوکردووە. بڕوانامەی بەکالۆریۆسی لە بەشی ئەندازیاری شارستانی لە زانکۆی سلێمانی بەدەستهێناوە. ساڵی ٢٠١١ لە بەڕێوەبەرایەتیی ڕێگاوبانی هەڵەبجە وەک ئەندازیار دامەزراوە. نزیکەی پێنج ساڵ وەک ئەندازیاری بەڵێندەری کۆمپانیا و نۆ ساڵ وەک ئەندازیاری سەرپەرشتیار لە بەڕێوەبەرایەتیی ڕێگاوبانی هەڵەبجە سەرپەرشتی پڕۆژەى کردووە. لە ٨ی ١١ی ٢٠٢١ لەگەڵ هێنانەکایەی بەڕێوەبەرایەتیی گشتیی وەبەرهێنانی هەڵەبجە، وەک یەکەم بەڕێوەبەری گشتی دەستبەکاربووە و هەتا ئێستا بەردەوامە.
بەڕێوبەرى بەڕێوبەرایەتیى نەوت و کانزاکانى هەڵەبجەیە. ساڵی ١٩٨٥ لە گوندى (باوەکۆچەک) لەدایکبووە. بڕوانامەی بەکالۆریۆسی لە بەشی جیۆلۆجی لە زانکۆی سەڵاحەدین بەدەستهێناوە. سەرەتا بۆ ماوەی ساڵ و نیوێک لە فەرمانگەی ئاوی هەڵەبجەی شەهید دەستبەکاربووە. دواتر لە ساڵی ٢٠١٢ بووە بە فەرمانبەر لە سەرۆکایەتیی شارەوانیی هەڵەبجەی شەهید. کە بەڕێوبەرایەتی نەوت و کانزاکانی هەڵەبجە کراوەتەوە، وەک یەکەمین بەڕێوبەری ئەم بەڕێوبەرایەتییە دەستبەکاربووە و تا ئێستا بەردەوامە.
بەڕێوبەری بەرێوبەرایەتیی خانەنشینی پارێزگای هەڵەبجەیە. ناوی (سامان حەمەئەمین عەبدولقادر)ە. ساڵی ١٩٨٦ لە گوندی (خێڵی حەمه)ی سەر بە شارۆچکەی خورماڵ لەدایکبووە. قۆناغی سەرەتای لە خێڵی حەمە و ناوەندی لە هەڵەبجە و ئامادەیی لە خورماڵ تەواوکردووە. بڕوانامەی دبلۆمی لە پەیمانگای تەکنیکی لە هەڵەبجه بەدەستهێناوه. ساڵی ٢٠١١ له بەڕێوبەرایەتیی خانەنشینی هەڵەبجه دامەزراوە. ساڵی ٢٠١٨ بووە بە جێگری بەڕێوبەری گشتی و ساڵی ٢٠٢٠ بووە بە بەڕێوبەری گشتیی بەڕێوەبەرایەتیی خانەنشینی هەڵەبجە بە وەکالەت و له ٢١ی ١١ی ٢٠٢١ بووە بە بەڕێوبەری بەڕێوبەرایەتیی خانەنشینی پارێزگای هەڵەبجە و تا ئێستاش بەردەوامه.
بەڕێوبەرى بەڕێوەبەرایەتیى مەشق و ڕاهێنانى سلێمانى و وەرزشەوانی دێرینە. ناوی (سەربەست کەریم محەممەد مەحموود)ە. ساڵى ١٩٦٩ لە گوندى (باوەکۆچەک) لەدایکبووە. بەشى فیزیای لە زانکۆى موسڵ خوێندووه. لە ئێستادا بەڕێوەبەرى بەڕێوەبەرایەتیی مەشق و ڕاهێنانى پەروەردەییە لە سلێمانى. لە ساڵی ١٩٩٩ بۆ یەکەم جار پەیمانگای مەڵبەندی مامۆستایان لەھەڵەبجە کرایەوە، مامۆستا سەربەست یەکەم بەڕێوەبەری پەیمانگا بووە. دواتر، کە لە ساڵی ٢٠٠٤ بەڕێوەبەرێتی پەروەردە لە ھەڵەبجە کرایەوە، مامۆستا سەربەست یەکەمین بەڕێوەبەری پەروەردەى هەڵەبجە بووە. دووبارە لە ساڵی ٢٠٠٥ بۆ بەڕێوبەری پەیمانگای مەڵبەندی مامۆستایان گەڕاوەتەوە و تا کاتی داخستنی لە ئەرکەکەیدا ماوەتەوە. یاریزانی تۆپىپێ و یاریى تۆپى سەرمێز بووە. لەم تیپە میللییە وەرزشییانەی هەڵەبجەدا یاریکردووە: (تیپى وەرزشیى هێمن، تیپى وەرزشیى سیروان، تیپى وەرزشیى هەڵبژاردەى هەڵەبجە). لە یاریى تۆپى سەرمێز لە هەڵبژاردەى تازەپێگەیشتووانى هەڵەبجەدا یارىکردووە و لە چەند خولى جیاواز، وەک لەسەر ئاستى عێراق و خولى ناوچەى باکور و ناوچەى فەرمانڕەوایى خۆیى (ناوچەى حوکمى زاتى)، لە یارى تۆپى سەرمێز بەشداریکردووە.
بەڕێوەبەری گشتیی ڕۆشنبیری و هونەری هەڵەبجەیە. بە مامۆستا سەرخێڵی مۆنۆمێنت ناسراوە. ساڵی ١٩٧٩ لە شاری هەڵەبجە لەدایکبووە. دەرچووی بەشی ئینگلیزیی کۆلێژی زمانی زانکۆی سلێمانییە و لە پەیمانگای مامۆستایانی هەڵەبجە دامەزراوە. ساڵی ٢٠٠٦ بووە بە بەڕێوەبەری مۆنۆمێنتی شەهیدانی هەڵەبجە و تا ٢٠٢٣ بەردەوامبووە. ئەندامی ڕێکخراوی یەکێتیی مامۆستایان و مۆنۆمێنیتەکانی جیهان بۆ ئاشتی و کۆمەڵەی قوربانیانی کیمیاباران و opcw بۆ چەکی کۆکوژ و ڕێکخراوی mayors for peace یە. بەشداری کۆنفرانسی ئاشتیی گەلانی ٢٠١٠ی یابان، ٢٠١٢ی ئێران و ڕاهێنان بۆ ئەرشیف و دۆکیۆمێنتی ٢٠١٧ لەپۆڵەندا کردووە. لە ئێستادا بەڕێوەبەری گشتیی ڕۆشنبیریی هەڵەبجەیه. ژیانی هاوسەریی پێکهێناوە و خاوەنی سێ منداڵە.