حەمید بارام حەمەحسێن بارام
بەڕێوەبەری شارۆچکەی بیارەیە. ساڵی ١٩٧٧ لە (ڕومادی) لەدایکبووە. تا قۆناغی ئامادەیی لە سلێمانی خوێندوە. کۆلێژی یاسای زانکۆی سلێمانی تەواوکردووە. ماوەی ١٠ ساڵ پارێزەریی کردووە. وەک نوسەر لە ڕادیۆی نەوا کاریکردووە. بە شێوەی خۆبەخش لەگەڵ ڕێکخراوەکانی کەمئەنداماندا کاریکردووە. لە ١١ی ٥ی ٢٠١٥ بووە بە بەڕێوەبەری ناحیەی بیارە و تا ئێستا بەردەوامە. جگە زمانی دایکیی، عەرەبی و ئینگلیزی دەزانێت. ژیانی هاوسەریی پێکهێناوە و خاوەنی دوو منداڵە.
سمکۆ سالار
ناوی (سمکۆ سالار موشیر)ە. ساڵی ١٩٧٦ لە شاری هەڵەبجە لەدایکبووە. قۆناغی سەرەتایی و ناوەندی و ئامادەیی لە شاری هەڵەبجە خوێندووە. بەکالۆریۆسی لە یاسادا لە کۆلیژی یاسا و ڕامیاری لە زانکۆی سلێمانی بەدەستهێناوە. دەرچووی خولی ئەفسەرانە. لە بواری یاساو کارگێڕیدا ٢٢ ساڵ خزمەتی هەیە. وەک بەڕێوەبەری ناحییەکانی (بیارە، خورماڵ، بەمۆ) و چەند جارێکیش وەک قایمقامی هەڵەبجە بە وەکالەت پۆستی هەبووە. ژیانی هاوسەریی پێکهێناوە و خاوەنی سێ منداڵە. لە ئێستادا(٢٠٢٤) بەڕێوەبەری ناحیەی بەمۆیە.
عەبدوڵا عادل ئال قازی
بەڕێوەبەری شارەدێی خورماڵە. لە خێزانی (ئال قازی)ی بەناوبانگن بە زانست و خواپەرستی. ساڵی ١٨٩٣ لە شارى سلێمانی لەدایکبووە و خوێندنی سەرەتایی لەوێ تەواوکردووە، قوتابخانەی (ڕوشديیەی سەربازیی) لە بەغداد خوێندووە. دواتر کۆلێژی مافی تەواوکردووە و ساڵی ١٩٢٧ بووە بە بەڕێوەبەری شارەدێی (عەزیزیە). دواتر لە ساڵى ١٩٤٦ کراوە بە بەڕێوەبەری شارەدێی خـورماڵ و چەند شارەدێیەکی تریش.
فەرەیدون مەحموود ڕەسول
ساڵی ١٩٧٥ لە شاری پێنجوێن لەدایکبووە و هەر لەوێ قۆناغەکانی خوێندنی تەواوکردووە. بەکالۆریۆسی لە یاسا و لە زانکۆی سلێمانی بەدەستهێناوە. لەچەند فەرمانگە و ناوچەیەکی کوردستان خزمەتیکردووە. چەند پۆستێکی بینیوە، لەوانە (محقق عدل) لە دادگای بەرایی پێنجوێن، لێپرسراوی بەشی یاسا لە بەڕێوەبەرایەتیی پاسپۆرتی سلێمانی، لەماوەی جیاجیادا لە گەرمک، زەلان، سیتەک، خورماڵ بەڕێوەبەری ناحیە بووە. ژیانی هاوسەریی پێکهێناوە و خاوەنی سێ منداڵە. لەئێستادا بەرێوەبەری ناحیەی خورماڵە و لە شاری سلێمانی نیشتەجێیە.
ناصر ئەحمەد غەفور
بەڕێوەبەری شارۆچکەی (بیارە)یە. ساڵی ١٩٦٤ لە بیارە لەدایکبووە. خوێندنی سەرەتایی و ناوەندی لە بیارە و خانەی مامۆستایانی لە سلێمانی تەواوکردووە و وەک مامۆستا دامەزراوە. وەک بەڕێوەبەری قوتابخانەی بیارە خزمەتیکردووە. ساڵی ١٩٩٦ تا ٢ی ٣ی ٢٠٠٣ بەڕێوەبەری ناحیەی بیارە بووە. بە هۆکاری گۆڕانکاری و ڕوداوەکان لەو کاتەدا دوورخراوەتەوە و خانەنشین کراوە. ژیانی هاوسەریی پێکهێناوە و خاوەنی پێنج منداڵە.
هێمن حەمەحسەین
بەڕێوەبەری شارۆچکەی (سیروان)ـە. ساڵی ١٩٨٦ لە گوندی (کانی شێخ) لەدایکبووه. بڕوانامەی بەکالۆریۆسی لە یاسا لە زانکۆی سلێمانی بەدەستهێناوە. لە ساڵی ٢٠١١ تا ئێستا بەرێوەبەری ناحیەی سیروانە.