پەیام
ساڵی ١٩٩٤ لەلایەن وەزارەتی ناوخۆی هەرێمی کوردستانەوە، مۆڵەتی فەرمی پێدراوە، ئەم یانەیە دووەم یانەی وەرزشییە، کە لە هەڵەبجەدا دامەزرابێت، کار و چالاکیی وەرزشیان لەم بەشانەدا ئەنجامداوە: تۆپیپێ، تۆپی بالە، تۆپی باسکە، تۆپی سەرمێز، شەترەنج، کاراتی، کیک بۆکسینگ، ماراسۆن، پاسکیل سواری و... هتد. یەکەم دەستەی کارگێڕیی ئەم یانەیە ئەمانە بوون: لوقمان عەبدوڵا سادق (سەرۆک)، عەبدوڵا حەمە سەعید حەمەساڵح (جێگری سەرۆک)، یاسین عەبدولقادر (دارایی)، فەلاح حەسەن کەریم (سکرتێر)، سۆران عەبدوڵا سادق (سەرپەرشتیاری تۆپی بالە).
سیروان
یانەیەکی وەرزشییە. ساڵی ١٩٩٨ لە شارۆچکەی (سیروان) دامەزراوە. بەشداری خولی کوردستانیان کردووە، چالاکیی وەرزشییان لە یارییەکانی: (تۆپیپێ، تۆپی بالە، کیک بۆکسینگ، کاراتی) ئەنجامداوە. لە خولی کوردستان یاریدەکەن، لە ئێستادا سەرۆکی یانەکە (جەمیل عەلی قادر)ە.
یانەی ئاسمانیی هەڵەبجە
یانەیەکی وەرزشییە. ساڵی ٢٠١٦ لە لایەن (توانا وەهبی، بەمۆ نەبەز، کامەران ئەحمەد حەمە و تۆلاز محەممەد)ەوە لە شاری هەڵەبجە دامەزراوە. تایبەت بووە بە چالاکیی پەڕەشووت، یان فڕینی ئاسمانی. چەندین چالاکی و فیستیڤاڵیان بۆ ئەنجامداوە. لە گرنگترینیان، بەشداری لە فیستیڤاڵی ساڵی ٢٠١٨ لە شاخی (باڵامبۆ) لە ناوچەی نەورۆڵی، کە چەندین یاریزانی وڵاتی ئێران و تورکیا بەشدارییان تێدا کرد.
هەڵەبجە
یانەی وەرزشی هەڵەبجە ساڵی ١٩٩٢ لەلایەن وەزارەتی ڕۆشنبیریی هەرێمی کوردستانەوە مۆڵەتی فەرمی پێدراوە، ئەم یانەیە یەکەم یانەی وەرزشییە، کە لە هەڵەبجەدا دامەزرابێت، کار و چالاکیی وەرزشیان لەم بەشانەدا ئەنجامداوە: (تۆپیپێ، تۆپی بالە، تپی باسکە، تۆپی دەست، تۆپی سەرمێز، کاراتی، شەترەنج، ماڕاسۆن و... هتد). یەکەم دەستەی کارگێڕیی یانەی وەرزشی هەڵەبجە ئەمانە بوون: ساڵح محەممەد (سەرۆک)، سەڵاحەدین حەمەنووری (جێگری سەرۆک)، ئەختیار سدیق (دارایی)، عوسمان فەرەج (سکرتێر)، نەبەز مەحموود کاکە شێخ (ئەندام)، محـەممەد فەرەج عـەبدوڕەحمان (ئەندام) عـابید عـەبدوڵا (ئەندام).