وەرزشەوانانی هەڵەبجەیی لە ئۆردوگای دزڵی
دواین نوێکردنەوە: 2026-04-08
مێژووی دامەزراندنی ئەم ئۆردوگایە دەگەڕێتەوە بۆ ساڵی ١٩٨٧ بۆ ١٩٨٨. سەر بە شارەدێی (دزڵی)یە لە قەزای مەریوان، پارێزگای کوردستان لە کوردستانی خۆرهەڵات. ئۆردوگای دزڵی نزیکەی (٢٦کم) لە شاری مەریوانەوە دوورە. ژمارەیەک لە وەرزشەوان و یاریزانی هەڵەبجە و دەوروبەری لەم ئۆردوگایە مەشق و ڕاهێنان و یاری دۆستانەیان ئەنجامداوە و لە خولی وەرزشیی ناوخۆیی ئۆردوگا و خولی شارۆچکە و گوندەکانی دەوروبەری ئۆردوگا بەشدارییانکردووە و پەیوەندی وەرزشییان لەگەڵ تیپەکانی دەوروبەردا هەبووە. سەرەتا دوو تیپی وەرزشیی بەهێز بە ناوەکانی (قەندیل و شاڵاو) لەم ئۆردوگایە دامەزران، پاشان چەند تیپێکی تر، کە ئەمانیش ئاستێکی باشیان لە ئۆردوگا و خولەکانی شارەدێ و گوندەکانی دەوروبەر پێشکەشدەکرد، دامەزران، کە ئەمانەن: (کۆچەر، بەڵێن، شرام، کوردستان، باوەڕ، مەولەوی). دیارترین کەسانی وەرزشی وەک سەرپەرشت و ڕێکخەری وەرزشی لە ئۆردوگا، چەند کەسێک بوون، لەوانە: عومەر حەمە فەریق، حسێن جەعفەر، عوسمان دەروێش، سەرکەوت حەمە مراد، سەباح محەممەد محەممەد ئەمین.
سەرچاوەکان:
- وەرزش و یاریزانانی هەڵەبجەیی لە تاراوگە، شوان ئەفراسیاب عەلی، (بەرهەمی بڵاونەکراوە)، ٢٠١٥.
- گفتوگۆی ئامادەکار لەگەڵ (سەباح محەممەد حەمەئەمین)، وەرزشەوانی دێرینی ئۆردوگاری دزڵی، ٢٨ی ٢ی ٢٠٢٣، لە هەڵەبجە.
- گفتوگۆی ئامادەکار لەگەڵ (ئاکۆ عەتا جافر)، نیشتەجێبووی ئۆردوگای دزڵی، مەریوان، ٢٧ی ٢ی ٢٠٢٣، لە هەڵەبجە.
ئامادەکردنی: شوان ئەفراسیاب عەلی