حەمەقوتوو
دواین نوێکردنەوە: 2026-04-14
ناوی (محەممەد ئیبراھیم عەبدول)ـە. ساڵی ١٩٣٩ لە شاری ھەڵەبجە لەدایکبووە. بەھۆی ئەوەی کەسێکی پۆشتە و ڕێکپۆش بووە، بە (حەمەقوتوو) ناسراوە. لە ژیانییدا چەند کارێکی کردووە، لەوانە شۆفێریی هێڵی (سلێمانی - ھەڵەبجە) بووە. ماوەیەک لە دەزگای ڕۆشنبیریی و ڕاگەیاندنیش فەرمانبەر بووە. سەرەتای گۆرانیوتنی بۆ سەردەمی لاوێتی دەگەڕێتەوه، کاتێک لەگەڵ چەند ھاوڕێیەکیدا بە کۆڵانەکاندا (بەتایبەتی کۆڵانەکانی گەڕەکی جوولەکان)دا ڕۆیشتوون و گۆرانی وتووە. ساڵی ١٩٥٤ بۆ تاقیکردنەوەی دەنگی چووەتە ئێستگەی بەغداد و شەش گۆرانی تۆمارکردووە. ساڵی ١٩٦١ ژیانی ھاوسەری پێکھێناوە و خاوەنی پێنج منداڵە. ھەرچەندە کەسێکی نەخوێندەواربووە، بەڵام زۆربەی گۆرانییەکانی لە ھۆنراوە و ئاوازی خۆیەتی و تێکەڵ بە فۆلکلۆری کردوون. بەشداری چەندین فیستیڤاڵ و ئاھەنگی لە شارەکانی: سلێمانی، ھەولێر و دھۆک کردووە و لەگەڵ (تیپی مۆسیقای سلێمانی) و (تیپی مۆسیقای مەولەوی)دا بەرھەمی ھەیە. نزیکەی بیست گۆرانی و ستایشێکی ئایینی لە تەلەفزیۆنی کەرکوک تۆمارکردووە. ساڵی ١٩٩٢ کۆچیدواییکردووە.
سەرچاوەکان:
- لە (ئەلبومی یادگارییەکان)ی (ئینستیتیوتی کەلەپووری کورد khi)ەوە وەرگیراوە کە (ڕێبوار حەمە تۆفیق) ئامادەی کردووە.
ئامادەکردنی: ڕێبوار حەمەتۆفیق