کانییە کانزاییەکانی گوندی
دواین نوێکردنەوە: 2026-04-14
سێ کانین و کەوتوونەتە خۆرهەڵاتی گوندی (بۆین) و گوێ چەمی ڕوباری سیروان. کانیی گەڕاو، ئاوەکەی کانزاییە و کبریتی زۆرە و بەپێی پشکنینەکان پێکهاتەکەی لە ئاوی کانزایی خورماڵ دەکات. کانیی نەوت ئاوەکەی چەورە و بریسکە دەداتەوە و چەند ساڵێک لەمەوبەر ئێران هەوڵیداوە لەڕێگەی لێدانی تونێلەوە بگاتە کۆگای ژێرەوەی بەڵام بەهۆی سەختیی ناوچەکەوە سەرکەوتوونەبووە. سێیەمیان پێیدەوترێت کانیی ئاوی ساف، کە کانییەکی ئاساییە بەڵام ڕەنگی ئاوەکەی مەیلە وسپیە. ئەم سێ کانیە هەمیشەیین، ساڵانە ئاوی ڕوباری سیروان دایاندەپۆشێت، بەڵام لەوەرزی هاوین هەرسێکیان دەردەکەون. کۆمپانیا ڕوسییەکان چەند ساڵێک لەمەوبەر پشکنینیان بۆ خاکی ئەم سێ کانیە کردووە و لە سەردەمی حکومەتی عێراقیشدا، لیژنەیەک، نمونەی ئاو، بەرد و خاکیان لێبردووە.
سەرچاوەکان:
- چاوپێکەوتنی ئامادەکار لەگەڵ (کەریم عەلی محەممەد)، لەدایکبوو: ١٩٤٢، پیشە: کاسب، لە ١٧ی ٣ی ٢٠٢٤.
- چاوپێکەوتنی ئامادەکار لەگەڵ (خەلیل مەولود نضر)، لەدایکبوو: ١٩٦٤، بڕوانامە: ئامادەیی، پیشە: فەرمانبەر، لە ١٧ی ٣ی ٢٠٢٤.
ئامادەکردنی: کارزان عەدنان حەمەسەعید