شانۆی سانەویی کوڕان
دواین نوێکردنەوە: 2026-04-15
ئەو تەختە شانۆییەیە، کە لەناو هۆڵی قوتابخانەی سانەویی هەڵەبجەی کوڕاندا، ساڵی ١٩٧٠ لەلایەن هونەرمەند عومەر خەزانەوە دروستکراوە. بریتییە لە سەکۆیەکی نیمچەخڕی مەترێک یان زیاتر بەرز، لەگەڵ دوو ژووری ڕاست و چەپی شانۆکەدا، دروستکراوە. ئەم ژوورانە بۆ خۆگۆڕین و ئارایشت بەکارهاتوون. ژێرەوەی تەختەی شانۆکە، بۆش بووە. ئەکتەرەکانی لە ژێرەوە لە نێوان دوو ژووری ڕاست و چەپی شانۆکەدا، بەپێی پێویست، هاتوچۆیان کردووە. هۆڵی ئەم شانۆییە نزیکەی ٣٠٠ کەسی گرتووە. لەڕووی پێشەوەی سەکۆکە بەخەتی (هیوا حلمی) لێی نوسرابوو: شانۆ قوتابخانەی گەلە. زۆربەی بەرهەمە هونەرییەکانی ساڵى١٩٧٠ بەدواوە لەسەر ئەم تەختەی شانۆییە پێشکەشکراون. ئەم شانۆییە ساڵی ١٩٧٠ میوانداری کۆمەڵەی هونەر و وێژەی کوردی سلێمانی دەکات و شانۆگەریی (ئۆتۆمبێلچی) پێشکەشدەکەن. بە ئامادەیی مەکی عەبدوڵا، میوانداریی تیپی یەکێتیی نەقابەی کرێکاران دەکات، بۆ پێشکەشکردنی چالاکیەکانیان.
سەرچاوەکان:
- مێژووی شانۆ لە هەڵەبجە، عبدالله حەمەلاو، چاپخانەی هەواڵ، ٢٠٠٠، ل١٦ و ٣٥ – ٣٦.
- چیرۆکەکانی شار، کۆچەر میرزا، کتێبی سێیەم (مێژووی شانۆ لە هەڵەبجە)، چاپی یەکەم، چاپخانەی ڕێدار، ٢٠٢٢، ل١١٧.
- ژیاننامەی هیوا حلمی، مەریوان سەلاح حلمی، لە دایکبووی ١٩٦٩، بەکالۆریۆس، مامۆستا، ١٨ی ٣ی ٢٠٢٥ بۆ ئامادەکار، مەسنجەر.
ئامادەکردنی: هومایون ساحیب کەریم