ئۆردوگای ئەنزڵی
دواین نوێکردنەوە: 2026-04-15
گروپێکی هونەرییە. بە (تیپی شۆڕش)یش ناسراوە. ساڵی ١٩٧٤ دوای ئاوارەبوونی خەڵکی هەڵەبجە و گواستنەوەی ئاوارەکان بۆ ئۆردوگای ئەنزڵی لە سەرپێڵ زەهاو، کۆمەڵێک لە هونەرمەندانی هەڵەبجە و کوردستان، دامەزراندنی گروپێک بۆ ئەدەبیات و شانۆ و مۆسیقا و شێوکاری گەڵاڵە دەکەن. بە بیرۆکەی ڕێبوار ئەحمەد غوڵام و ئەندامیی (فەوزی حەمەڕەشیدی ڕەسام، حەمیدی مەلا خەرامان، فریای شێخ حەسەن بەرزنجی، کەمال مستەفا، هاوار خەتات، عەبدولکەریمی قشڵاخە ڕووتەیی). چەند بەرهەمیان لە شانۆ و شێوکاری و مۆسیقا پێشکەشکردووە. لەوانە (ئەنجامی دیکتاتۆر، کورد نابەزێت یان بۆردومانی هەڵەبجە ١٩٧٤). لیژنەی هونەریی شۆڕش، کە لە: (ئەحمەد سالار و نووری وەشتی و ڕەئوف یەحیا) پێکهاتبوون، بەرهەمەکەیان هەڵدەبژێرن بۆ فیستیڤاڵی شۆڕشی گەلان لە بەرلین، بەڵام کارەساتی نسکۆ بەسەردا دێت و کارەکە ناکرێت.
سەرچاوەکان:
- چیرۆکەکانی شار مێژووی شانۆی هەڵەبجە لەیادەوەری کارەکتەرەکانەوە، کۆچەر میرزا، کتێبی سێیەم، چاپی یەکەم، ،ڕێدار ٢٠٢٢، ل١٠٠ و ٣٠٠.
- گفتوگۆی ئامادەکار لەگەڵ هونەرمەند (ڕێبوار ئەحمەد غوڵام)، لەدایکبوو: ١٩٥٥، بڕوانامە: ئامادەیی، پیشە: خانەنشین، لە ١٨ی ١١ی ٢٠٢٣.
ئامادەکردنی: هومایون ساحیب کەریم