چالاکیی گەنجانی هەڵەبجە

سەر بە ڕێکخراوی منداڵپارێزی کوردستانە. بە ئامانجی بایەخدان بە گەنجان و دەرخستنی تواناکانیان ساڵی ٢٠٠٨ دامەزراوە. شوێنی بیناکەیان لە نزیک نوسینگەی پەرلەمان بووە بەرانبەر بانکی هەڵەبجە. ساڵی ٢٠٢١ داخراوە. یەکەم بەڕێوەبەری (تەها حەمەڕەشید حەسەن) و دوا بەڕێوەبەریشی (ڕاڤیار نەوزاد محەممەد) بووە. لەم بەشانە پێکهاتووە:

١- موزیک: زیاتر لە ٢٠ کۆنسرێت و چالاکیی تایبەتی هەبووە و لەسەرجەم یادەکانی هەڵەبجە و بۆنە ئەدەبی و ڕۆشنبیرییەکانی تردا بەشداریکردووە. زیاتر لە ١٥٠ خولی کردووەتەوە.

٢- شێوەکاری: بە دەیان پێشانگای هاوبەشی لە دەروەی شار و ناوەوەی شاردا کردووەتەوە.

٣- دروومان: بەردەوام خولی تایبەتی بە فێربوون کردووەتەوە و پێشانگای بۆ بەرهەمی خانمان ڕێکخستووە و هەلیکاری بۆ زیاتر لە ٤٠ لە کەس لە هەردوو ڕەگەز ڕەخساندووە.

٤- فێربوونی زمان: زۆرتر بایەخی بە فێربوونی زمانی ئینگلیزی و فارسی داوە و زیاد لە ٢٠ خولی کردووەتەوە.

٥- کتێبخانە: زیاتر لە ٢٠٠٠ ناونیشانی کتێبی تێدابووه.

٦- کۆمپیتەر و ئینتەرنێت: هێڵی ئێنتەرنێتیان بێبەرامبەر بۆ گەنجان دانینکردووە و خولی فێربوونی کۆمپیتەری کردووەتەوە.

٧- وەرزش: لە بوارەکانی (تێنسی سەرمێز، شەترەنج، ماراسۆن بۆ کچانی شار)دا چالاکییان هەبووە.

٨- چالاکیی ئەدەبی و ڕۆشنبیری: زیاتر لە ٥٠ چالاکی لە بوارەکانی (شیعر، چیرۆک، فەلسەفە، دەروونی، پرسەکانی گەنج و مافی ئافرەتان و ...) ئەنجامداوە.

٩- شانۆ: لە سەردەمی کۆتا بەڕێوەبەریدا کراوەتەوە و هەر خۆیشی سەرپەرشتیکردووە.