مێجەرسۆن
دواین نوێکردنەوە: 2026-07-14
مێژوونوس، گەڕيدە، ئەنترۆپۆلۆگ، زمانەوان، ڕۆژنامەوان، ئەفسەرى هەواڵگریی سەربازیی و حاکمى سیاسى بەریتانییە. ناوی (ئەیلی بانستەر سۆن)ـە. ساڵی ١٨٨١ لەدایکبووە و لە ١٩٢٣ کۆچیدواییکردووە. ساڵی ١٩٠٩ بەناوى نهێنى (میرزا غوڵام حسێنی شیرازی)یەوە هاتووەتە ناوچەکە و چەند ساڵێک ماوەتەوە و دواتر لەلایەن عوسمانییەکانەوە دەستبەسەرکراوه. پاش جەنگی یەکەمی جیهانی، جارێکی تر لەلایەن حکومەتی بەریتانیاوە ڕاسپێرراوە تا سەردانی میزۆپۆتامیا بکات و بە شێوەی نهێنی زانیاری لەسەر ناوچەکە کۆبکاتەوە. بۆ ماوەی نۆ مانگ لە هەڵەبجە ماوەتەوە. ساڵی ١٩١٩ بۆ ١٩٢٢ حاکمی سیاسيی ئينگليزەکان بووە لە سلێمانی و دژایەتی شێخ مەحموودی کردووە. لەگەڵ ئەوەشدا خزمەتگوزاریی زۆری پێشکەشکردووە، لەوانە: ڕێگای سەرەکیی (سلێمانى - هەڵەبجە)ى کردووەتەوه، ماوەى ساڵێک لامەرکەزییەتی دارایی بۆ سلێمانی جێبەجێکردووە، کە هەڵەبجەش بەشێک بووە لەو یەکە کارگێڕییە. دەوترێت (لۆنێت سۆن)ی هاوسەری مێجەرسۆن، بەر لەوەی کۆچیدوایی بکات، خانووەکەی خۆی پێشکەش بە منداڵانی هەڵەبجە کردووە. سۆن، ژمارەیەک زۆر کتێبی نوسیوە لەوانە: (گەشتێک بۆ وڵاتە میزۆپۆتامیا "دوو بەرگ"، ڕاپۆرتێک سەبارەت بە سلێمانی ناوچەیەک لە کوردستان)، کە زانیاریی گرنگی لەسەر هەڵەبجە و شارەزوور و خاتوو عادیلەخانم و ئەو ماوەیە تێدایه، کە لەو ناوچەیە ماوەتەوە.
سەرچاوەکان:
- هەفتەنامەى پێشکەوتن، ژمارە ٢، ١٩٢٠ (بڕیارەکانی مەجلیسی شار بە سەرۆکايەتى مێجەرسۆن).
- گۆڤاری (خاڵ)، چاوپێکەوتن لەگەڵ (ڕووناک ئەحمەد بەگی جاف)، ژمارە ٢٧ی مانگی شوباتی ٢٠٢١.
- کورد وتورک و عەرەب، سیسیل جۆن ئیدمۆنس، وەرگێڕانی: حامید گەوهەری، چاپی دووەم، دەزگای چاپ و بڵاوکراوەی ئاراس، هەولێر، ٢٠٠٤، ل٤٩.
ئامادەکردنی: ڕێبوار حەمەتۆفیق