عوسمان هەورامی
دواین نوێکردنەوە: 2026-04-08
شاعیر، نوسەر و پەروەردەکارە. ناوی (عوسمان محەمەد ساڵح فەرەج)ـە. ساڵی ١٩٤٠ لە(تەوێڵە) لەدایکبووە و هەر لەوێ نراوەتە بەر خوێندن. قۆناغەکانی سەرەتایی و ناوەندی و ئامادەیی و دەورەی مامۆستایانی تەواوکردووە و بووەتە خوێندکاری کۆلێژی ئاداب. بایەخی بە فۆلکلۆر و کەلەپور و کۆکردنەوەی شیعری شاعیران و دەستنوسان و ئەدەبی منداڵان و ئەلفبێ و کتێبەکانی نەهێشتنی نەخوێندەواری و ڕێنوس و نوسینی لاتینی داوە و لەو ڕووەوە چەند بەرهەمێکی پێشکەشکردووە. لە چەندین ناوەندی پەروەردەیی و ئەدەبیدا کاریکردووە و دەیان ساڵ بەرنامەی (خەندە)ی بۆ منداڵان پێشکەشکردووە و شەش ساڵیش لە ڕادوێی (خاک) بەرنامەی هەورامی هەبووە. ڕابەری نوسینی شیعری نوێی هەورامییە و لە ڕۆژنامە و گۆڤارەکاندا بەرهەمەکانی بڵاوکردووەتەوە. خاوەنی ١٧ بەرهەمی چاپکراوی منداڵانە، لەوانە:(شاهۆ، خونچە گوڵ، چاوانی باوان، مافە گەشەکەم). لە نمونەی بەرهەمە ئەدەبیەکانی تری:(دیوانی سەیدی، دیوانی وەلی دێوانە، کەشکۆڵی حاجی مەحموودی یاروەیس، لایلایەی دایکانی کورد بەهاوبەش، دیوانی حاجی باقی بەنگینە). ماوەیەک سەرنوسەری گۆڤاری هەورامان بووە. ئەندامی یەکێتیی نوسەران و مامۆستایان و مەڵەبەندی ڕۆشنبیریی هەورامان و فۆلکلۆر بووە. ژیانی هاوسەریی پێکهێناوە و خاوەنی ١٠ منداڵ بووە. ساڵی ٢٠٢٠ کۆچیدواییکردووە و لە گردی سەیوان لە سلێمانی بەخاکسپێرراوە. لە پاش کۆچیدوایی، چوار دیداری ئەدەبی بە ناوەوە بۆ ڕێکخراوە و پەیکەری لە حەوشەی ڕۆشنبیری هەڵەبجەی شەهید بۆ دانراوە.
سەرچاوەکان:
- سەربوردێکی هەورامان و سەردانێکی تەوێڵە، عبدالرزاق عبدالرحمن محمد، چاپی یەکەم، چاپخانەی مەهارەت، تاران، ٢٠٠٥، ل١١٩.
- دیداری مامۆستا عوسمان هەورامی، مەڵبەندی رۆشنبیری هەورامان، لە تەلاری هونەر لە شاری سلێمانی، لە ١١ی ٦ی ٢٠٢٢.
- دیداری عوسمان هەورامی بۆ ئەدەبی مندالان، سەنتەری روناکبیری جاف، لە ٩ی ١١ی ٢٠٢٤، لە هەڵەبجە.
- یاداشتەکانی حسن قادر حسن، بڕوانامەی بەکالۆریۆس و مامۆستا، کە تێبینی لەسەر کەسایەتیەکانی تەوێڵە لەسەر کتێبەکان و یادەوەری نامەکەیدا نوسیوە. بڵاونەکراوەتەوە.
ئامادەکردنی: هومایون ساحیب کەریم