محەممەد فەرەج حسين
به (محەممەدى حاجى فەرەج ديکۆنى) ناسراوە. ساڵى ١٩٦٦ لە گوندى (دێکۆن)ى سەر بە ناحيەى (خورماڵ) لەدایکبووە. بڕوانامەى بەکالۆريۆسى لە زمانى عەرەبیدا بەدەستهێناوه. ساڵی ١٩٩٨ هەتا ٢٠٠٠ بەڕێوەبەرى ڕادوێى هەورامان/شارەزوور بووە، کە لە ناحيەى خورماڵ پەخشکراوە. ساڵی ٢٠٠٢ هەتا ٢٠٠٤ بەڕێوەبەرى تەلەڤزيۆنى مەرکەزیى کۆمەڵی ئيسلامى بووە. ساڵى ٢٠٠٥ بووە بە سەرنوسەرى گۆڤارى مامۆستايانى پێشەنگ. بابەتى لە ڕۆژنامەکانى: کوردستانى نوێ و کۆمەڵدا بڵاوکردووەتەوە. ژیانی هاوسەریی پێکهێناوە و خاوەنی پێنج منداڵە. ساڵى ٢٠١٨ بە نەخۆشى کۆچیدوايیکردووه.
محمد يوسف بەکر
بە(یوسف هەورامى) ناسراوە. لە ساڵی ١٩٦٠ لە دايکبووە، دەرچووى ئامادەييە، سەرەتای کارکردنی لە گۆڤاری(الوتن الریاز)ی بووە، کە لە ساڵی١٩٨٤ – ١٩٨٨ بابەتی وەرزشی لەو گۆڤارەدا بڵاوکردوەتەوە. لەساڵی ٢٠٠٧وە بەرپرسی نوسینگەی ڕۆژنامەی خەباتە لە پارێزگای هەڵەبجە و وەک پەيامنێرى ئەو ڕۆژنامەيە دەيان راپۆرت و هەواڵى جواروجۆری سنورەکەی بۆ ڕۆژنامەکە ئامادەکردووە، ئەندامى سەنديکاى ڕۆژنامەنوسانى کوردستانە، خێزاندارە و خاوەنى پێنج منداڵە و دانیشتووی پارێزگای هەڵەبجەیە.
ناسیح خارگێڵانەیی
ڕۆژنامەوان و شانۆکار و شاعیرە، ناوی (ناسح ئەحمەد مەحموود)ە. ساڵی ١٩٦٦ لە گوندی (خارگێڵان) لەدایکبووە. ئامادەیی سیروانی تەواوکردووە. لەساڵی ١٩٨٢ەوە هۆنراوە دەنوسێت. ساڵی ٢٠٠٧ پەیامنێری ڕادوێی دەنگی کوردستانی عێراق - پەخشی هەڵەبجە بووە. هەمان ساڵ، لەگەڵ چەند ڕۆژنامەنوسێکی خورماڵ و هەورامان، ڕۆژنامەی (هەورامان)، (کە دواتر ناوەکەی گۆراوە بۆ هانا)یان دەرکردووە و ئەندامی دەستەی نوسەرانی بووە. ماوەی سێ ساڵ ئامادەکاری بەرنامەیەکی دیکۆمێنتاری بووە بۆ تەلەفزیۆنی وار تیڤی. بەشداری لە فیستیڤاڵە ئەدەبی و کلتورییەکانی هەوراماندا کردووە. لە دەستەی بەڕێوەبەرانی تیپی شانۆی هەورامانی بیارە بووە. ژیانی هاوسەریی پێکهێناوە و خاوەنی چوار منداڵە. لە ئێستادا لە خورماڵ نیشتەجێیە و فەرمانبەرە.
ناسیح عەبدولڕەحیم ڕەشید
ناوی (ناسیح عەبدولڕەحیم ڕەشید ئەمین)ـە. ساڵی ١٩٧٨ لەگوندی (هانەسوورە)ی ناوچەی نەورۆڵی لەدایکبووە. دوو بڕوانامەی بەکالۆریۆسی لە بوارەکانی یاسا و بایۆلۆجیدا بەدەستهێناوە. لەوکاتەوەی خوێندکاری زانکۆ بووە نوسین و بەرهەمەکانی بڵاوکردووەتەوە. لە ساڵی ٢٠٠٥ـەوە کاری ڕۆژنامەوانی دەستپێکردووە و له: ڕۆژنامەی خوێندنی لیبراڵ، گۆڤارەکانی ڕێگا، لڤین، ڕێگا مەگەزین، تاک، پرێس، ساماڵ، فشار و کەناڵی ستێرک تیڤی کاریکردووە. لە دەستەی نوسەرانی گۆڤاری ڕێگا مەگەزین بووە. ژیانی هاوسەریی پێکهێناوە و خاوەنی چوار منداڵە. پیشەی کارمەندی تەندروستییە لە هەڵەبجە.
نەبەز شارەزووری
ناوی (نەبەز جەمال محەممەد ئەمین عەباس)ـە. خەڵکی گوندی (ئاواییی ڕۆستەم بەگ)ـە لە سنوری شارۆچکەی (خورماڵ). ساڵی ١٩٧٢ لەدایکبووە. بەشی ڕاگەیاندنی لە پەیمانگای تەکنیکیی هەولێر تەواوکردووە. بڕوانامەی بەکالۆریۆسی لە ڕاگەیاندندا بەدەستدەهێناوە. پاش ڕووخانی ڕژێمی سەدام، چووەتە بەغداد و لە سەردەمی ئەنجومەنی دەسەڵات (مجلس الحکم)، لە نوسینگەی ڕاگەیاندنی ئەنجومەنی وەزیرانی عێراق دامەزراوە. بۆ ماوەی شەش مانگ بەشداری لە خولێکی ڕاهێنانی میدیاکاران بەسەرپەرشتی ڕێکخراوی (ئادەم سمیس)ی ئینگلیزی کردووە. لەپاش هەڵبژاردنەکانی ساڵی ٢٠٠٥ چووەتە فەرمانگەی ڕاگەیاندنی سەرۆکایەتیی کۆمار. ساڵی ٢٠١٩ خولێکی فێرکردنی زمانی کوردی بۆ کارمەندانی سەرۆکایەتیی کۆمار کردووەتەوە. جگە لە زمانی دایکی، عەرەبی و فارسیش دەزانێت. ژیانی هاوسەری پێکهێناوە و خاوەنی سێ منداڵە. لە ئێستادا وەک ڕۆژنامەنوس لە نوسینگەی سەرۆک کۆمار و ئەندامی فەرمانگەی ڕاگەیاندنی سەرۆکایەتیی کۆمار کاردەکات.
نەریمان سابیر محەممەد
ڕۆژنامەوان و شانۆکارە. ساڵی ١٩٨٠ له شارۆچکەی (خورماڵ) لەدایکبووە. لە دامەزرێنەرانی (گروپی هونەری ڕاستی)یه، کە لە قەزای (شارەزوور) دامەزراوە. لە چەندین شانۆگەری و فلیم و نواندنی تەلەفزیۆندا بەشداربووە، لەوانە: شانۆگەرییەکانی (دارقەیسی، سەرفەری ڕۆحێکی گۆیا، دوو زیندانی، هەڵەبجە، تەیری گول، حەوشی گەورە)، فلیمەکانی (قاچاخچی، هەڵە، بەڵا). لە ساڵی ١٩٩٤ەوە لە ڕۆژنامە و گۆڤارەکاندا نوسینی بڵاوکردووەتەوە. وەک (پەیامنێر، وێنەگر، مۆنتێر، ئامادەکار و پێشکەشکار، بەرپرسی بەش) لە ڕاگەیاندنەکاندا کاریکردووە. لە ماوەی جیاجیادا سەرنوسەرى گۆڤاری پێشکەوتن، ڕۆژنامەی ڕێبازی ئازادی بووە. ساڵی ٢٠١٤ تا ٢٠١٧ بەڕێوەبەری سەتەلایتی (جەماوەری کوردستان) بووە. ئەندامی دەستەی دامەزرێنەری کۆمەڵەی هونەری میللیی کوردستانە. ژیانی هاوسەریی پێکهێناوە و خاوەنی سێ منداڵە.