شاوێس قولی
دواین نوێکردنەوە: 2026-04-15
ناوی (شاوێس قولی کوڕی پیر قەنبەری شاهۆیی)یە. دایکی ناوی (زەڕبانوو خاتوون) بووە. ساڵی ١٤٠٧ز لەدایکبووە. خەڵکی گوندی (دەرزیان)ی ناوچەی شاخی شاهۆیە. شاعیرێکی دیار بووە و زۆرینەی شیعرەکانی بە شێوەزاری هەورامی بووە. نازناوی شیعری (قرمزی)ی بووە. لە ئەفسانەی یارسانەکاندا، بە پێنجەمین ئەدگاری کردگار لە سەرزەوی دادەنرێت. چیرۆکی لەدایکبوونی یەکێکە لە ئەفسانەکانی نێو ئەدەبیاتی ئاینی یارسان، کە گوایە وەک منداڵێکی باو لەدایکنەبووە، بەڵکو کردگاری شای گێتی لەگەڵ یارانیدا سەرێکی لێدەدەن و ئەم منداڵەی پێدەبەخشن. شاوێس قولی هەر بە ڕەبەنی ماوەتەوە و خێزانی پێکنەهێناوە. ساڵی ١٥١٤ز کۆچیدواییکردووە. لە دیارترین شیعرەکانی چوارینەیەکە کە دەڵیت:
ئەسڵمەن جە کورد، ئەسڵمەن جە کورد
بابۆم کوردەنان، ئەسڵمەن جە کورد
من ئەو شێرەنان، چەنی دەستەی کورد
سڵسڵەی سپای زەحاک کەردم ورد
سەرچاوەکان:
- مێژووی ئەدەبی کوردی، مارف خەزنەدار، بەرگی یەکەم، دەزگای ئاراس، چاپی دووەم، ٢٠١٠، هەولێر، ل٣١٧-٣٠١٩.
- فەلسەفەی یارسان، وەرگێڕانی: بیهزاد خوشحالی (سایتی هەواڵنامەی کتێب: https: //shorturl. at/osuNX ).
ئامادەکردنی: د. هەردی مەهدی میکە