گردی کاوات

کەوتووەتە سنوری ناحیەی (بیارە). بە دامێنی شاخی (وەرانوەر) هەڵکەوتووە و بە تەپی (ئەحلە)ش ناودەبرێت. بەرزییەکەی نزیکەی (١١٠٠م) دەبێت. شوێنی نیشتەجێبوونی (کەیقوبادی کوردی) بووە. ناوەکەشی هەر بۆ ئەو دەگەڕێتەوە. وەک لە سەرچاوەکاندا هاتووە، پیتی (ک) بەواتا پیاوێکی گەورە و دەسەڵاتداری وەک (کەی قوبادی ماددی) و (اوا) بە واتای ئاوەدانی دێت، لە زۆر شوێنی دیکەی هەوراماندا هەمان ناو دووبارە بووەتەوە. لەڕووی مێژووییەوە ناوبانگی هەیە. ئاشوورییەکان کاتێک لە شاخی (کڵاوەی ئاشوور) لە بەرانبەر بیارە تێکشکاون، لەم گردەدا گیرساونەتەوە. شوێنەوارەکانی بۆ سەردەمی دەوڵەتی (ماد) دەگەڕێنەوە. لە بەڕێوەبەرایەتیی کەلەپوری سلێمانی هەڵگیراون، کە بۆ ٢٩٠٠ ساڵ لەمەوبەر دەگەڕێتەوە. لەسەر ئەم گردە فەرمانگەی ناحیەی (بیارە) هەڵکەوتووە. دەڕوانێت بەسەر ڕێگای سەرەکیی بیارە - تەوێڵەدا. هەندێکجار بەم گردەش دەوترێت (ئۆردوگا) یان (کەمپەکە)، چونکە لەدوای ٢٠٠٣ خێمەی تێدا هەڵدراوە.