پشیلەڕەش
دواین نوێکردنەوە: 2026-04-15
دەوترێت، کە ڕووداوەکە لە گوندی سەرکەنی پێنج کیلۆمەتری خۆرهەڵاتی شاری هەڵەبجە ڕوویداوە. گوندێکی ئاوەدان بووە. دانیشتوانەکەی دەکەونە بەر نزای کیژێکەوە، کە لە لایەن گەنجێکیانەوە دەستدرێژی کراوەتەسەر. بە هۆی پشیلەیەکی ڕەشەوە سەرجەم دانیشتوانەکەی بەر نەفرەتی خوا دەکەون و لە ناودەچن. پشیلەکە ڕۆژانە سەر دەکات بە ماڵێکدا و دەمیاوێنێت، دەمودەس ئەندامانی ئەو ماڵە دەمرن. گێرانەوەیەکی تر دەيبەسێت بە ڕوداوی شوکردنی کیژێکی ئێرانیەوە بەلاوێکی ئەم گوندە. کیژە برایەکی بچووکی لێ بەجێدەمێنێت، گەورە دەبێت و دێتە وڵاتی مێردی خوشکەکەی و دەیدۆزێتەوە و شەوانە دەچێتە ماڵی خوشکەکەی. خەڵک بوختانی بۆ دەکەن و دەڵێن دۆستی ژنەیە نەک برا. مێردەکەی شەو دەیکوژێت، خوشکەکە دوای کوشتنی براکەی دوعای لەناوچوونی خەڵکەکە دەکات. پشیلەڕەش پەیدا دەبێت و خەڵک دەزانن هۆکارەکە پشیلەڕەشەیە. دوای دەکەون بیکوژن، پشە دەچێتە کونێکەوە، هەتا ئێستاش بەو چەمە دەوترێت چەمی پشیلە ڕەش. بە دەرکەوتنی خێزانێک دەمرن و خۆی وندەکات هەتا تەرمی ئەوان دفن بکرێت، دەرکەوتووەتەوە و بەو جۆرە تاقیان لێدەبڕێت. تەنیا کوڕی پیرەژنێک ڕزگاری دەبێت.
سەرچاوەکان:
- گۆڤاری (هەڵەبجە)، ئەفسانەکانی حەقیقەت، مامۆستا بەهرۆز، ژمارە١٧، خولی دووەم، ٢٠٠٩، ل٥٢-٥٣.
ئامادەکردنی: هومایون ساحیب کەریم