وەیس
دواین نوێکردنەوە: 2026-04-08
کەوتووەتە باشوری گوندی (بامۆک). گۆڕستانێکی کۆنە، تاکە گۆڕستانی گوندەکەیە، گۆڕەکانی لە بیرەوەریی خەڵکی گوند نەبووە، خەڵکی گوندی باوەکۆچەکیش لەو گۆڕستانە مردوویان ناشتووە. کانییەکی تێدایە، وەیسی قەرەنی، کە نەزەرگەکەی لە خۆرهەڵاتی کوردستانە، لە گوندی (بامۆک)ەوە تێپەڕبووە و لەو کانییە دانیشتووە و پاشان بەناوی ئەوەوە ناونراوە. لەشوێنەکەی وەیسدا کەڵەکەبەرد بۆ پاراستنی شوێنەکەی دانراوە و هەتا ئێستەش ماوەتەوە. گۆڕستانەکە بە دارتوو دەوڵەمەندە، ساڵانە خەڵکی گوندەکە لە بنی ئەو دارتووانە قوربانی دەکەن و ئاژەڵ سەردەبڕن.
سەرچاوەکان:
- چاوپێکەوتنى تیمى مەیدانى لەگەڵ (عەتا ئەحمەد محەممەد مستەفا)، لەدایکبوو: ١٩٤٥، ئاستی خوێندن: سەرەتایی، پیشە: خانەنشین، لە ٢٠ی ٣ی ٢٠٢٤.
- چاوپێکەوتنى تیمى مەیدانى لەگەڵ (ناسر محەممەد مەحموود)ی ئەنجومەنی گوندی (بامۆک)، لەدایکبوو: ١٩٦٩، بڕوانامە: ئامادەیی، پیشە: فەرمانبەر، لە ٢٠ی ٣ی ٢٠٢٤.
ئامادەکردنی: ئوسامە ئەشرەف محەممەد