باوا سەرهەنگ
دواین نوێکردنەوە: 2026-04-08
کەوتووەتە باشوری شارۆچکەی تەوێڵە و خۆرئاوای خانەقای تەوێڵە، بەرزییەکەی (١٤٤٥م)ە لە ئاستی ڕووی دەریاوە، دەڕوانێتە سەر شارۆچکەی تەوێڵە، لە باکورەوە قەڵای گاوران و چیای هەرزگا و لە خۆرهەڵاتەوە خانەقای تەوێڵە و کانی وەیسوورە و لە خۆرئاواوە چیای هەوارە بەرزە و لە باشورەوە دۆڵی تەوێڵە و گەڕیات دەورەیانداوە. به ناوی یەکێک لە پێشەوایانی ئایینی یارسانییەوە ناونراوه، کە گۆڕەکەشی لە گۆڕستانەکەدایە. مێژووی گۆڕستانەکە دێرینە و بۆ سەدەی چوارەمی کۆچی دەگەڕێتەوە. گۆڕە دێرینەکانی گۆڕستانەکە دووقات و سێ قات لەسەر یەک دانراون. زۆرێک لە کێلەکانی ڕوو بە قیبلە نین. جۆری کێلەکان و نوسراوەکان و ئەو زەخرەفانەی بەکارهاتوون ئەو ڕاستییە دەردەخەن. بە (گۆڕستانی گەورەی تەوێڵە)ش ناودەبرێت. لە دوو بەش پێکدێت (گۆڕستانی بابا سەرهەنگ) و گۆڕستانی (حاجی بەشارەت)، کە ئەمیش گۆڕستانێکی گەورە و کۆنە. گۆڕی چەند کەسایەتییەکی تەوێڵەی تێدایە وەک (مەلا نەزیری گەورە و حاجی محێدینی کوڕی، سەید فەتحولموبین). لەم گۆڕستانە و لە بەشی دووەمیدا، دار بەڕوویەکی گەورەی زۆر کۆن هەیە پێیدەوترێت (سەید حەسن)، کە پەڕۆی سەوزی پێوەیە و بە شوێنێکی پیرۆز سەیردەکرێت.
سەرچاوەکان:
- چاوپێکەوتنی ئامادەکار (کارزان عەدنان حەمەسەعید) لەگەڵ (حەسن قادر حەسن)، لە دایکبوو: ١٩٦٧، بڕوانامە: بەکالۆریۆس، پیشە: مامۆستا، لە ١٥ی ٢ی ٢٠٢٣.
- پەیامی هەورامان، هادی ڕەشید بەهمەنی، چاپی دووەم، بەدرخان، سلێمانی، ٢٠٠٣، ل٤٢٢-٤٢٤.
- سەربوردێکی هەورامان و سەردانێکی تەوێڵە، عبدالرزاق عبدالرحمن محمد، چاپخانەی مەهارەت، تاران، ٢٠٠٥، ل٥٥٤- ٥٥٥.
- چاوپێکەوتنی ئامادەکار (یوسف باقی عەبدولقادر) لەگەڵ (فازیل عابید محەممەد)، لەدایکبوو: ١٩٦٣، بڕوانامە: بەکالۆریۆس، پیشە: ئەندازیاری خانەنشین، لە ١٥ی ٥ی ٢٠٢٣.
ئامادەکردنی: کارزان عەدنان حەمەسەعید,یوسف باقی عەبدولقادر,د. ڕێباز لوقمان مستەفا