چەمەو چناری
دواین نوێکردنەوە: 2026-04-09
یەکێکە لە کارێزەکانی شارەدێی تەوێڵە و کەوتووەتە دووریی (٢.٤کم) لە بەشی باکوری شارەدێی (تەوێڵە)ی و نێو هاوینەهەواری (ئاوێسەر)ى سەر بە ناحیەی (بیارە). (١٦٨١م) لە ئاستی ڕووی دەریاوە بەرزە. لە دووریی چەند سەد مەترێک لە سەیرانگای ئاوێسەر هەڵکۆڵراوە و سەرچاوەدەگرێت و ئاوی بەفری تواوەی چیاکانی دەوروبەری سەرچاوەی ئاو_پێدەری ئەم کارێزەن، پاشان ئاوەکەی بە نێو باخەکانی سەیرانگای ئاوێسەردا دەڕوات و لەلایەن گەشتیارانە بەکاردێت و دارگوێزەکانی چناری پێ ئاودێریدەکرێت و دەبێتە دەستپێک بۆ دروستبوونی چەمی ئاوێسەر و بۆری ئاوی خواردنەوەی لێوە هەڵگیراوە بۆ چەند باخێک و پڕۆژەی ئاوی خواردنەوەی شارەدێی تەوێڵە، تاوەکو ئێستا چەند جارێک خاوێنکراوەتەوە لەلەیەن دانیشتوانی تەوێڵە و بەڕێوەبەرایەتیی ئاوی سەرزەویی پارێزگای سلێمانیەوە، هەروەها چایخانەیەک و سەکۆیەکی چیمەنتۆی لەسەر بونیادنراوە و ئێوارانی وەرزی هاوین خەڵکی تەوێڵە کۆدەبنەوە بۆ یاریکردن و قسەی خۆش.
سەرچاوەکان:
- سەردانی مەیدانیی ئامادەکار بۆ شوێنەکە، لە ١ی ٣ی ٢٠٢٣.
- چاوپێکەوتنی ئامادەکار لەگەڵ (فازیل عابید محەممەد)، لەدایکبوو: ١٩٦٣، بڕوانامە: بەکالۆریۆس، پیشە: ئەندازیار، لە ١ی ٣ی ٢٠٢٣.
- بەکارهێنانی بەرنامەی (Google earth pro).
ئامادەکردنی: د. ڕێباز لوقمان مستەفا