دامەزراوەی دەوڵەتی موسەنا
دواین نوێکردنەوە: 2026-04-07
دامەزراوەیەکی عێراقییە بۆ بەرهەمهێنانی کیمیایی. ساڵی ١٩٨٠ پرۆگرامی چەکی کیمیایی عێراقی لەژێر ناوی دامەزراوەی بەرهەمهێنانی ژەهری مێرووکوژی تێدا دروستکراوە. ساڵی ١٩٨٧ ناوەکەی گۆڕاوە بۆ دامەزراوەی دەوڵەتی موسەناMSE. لەنێو بیاباندایە و ٢٠کم لە شاری سامەرراوە دوورە. لە چەندین دامەزراوە پێکهاتووە. وەک بەهەمی کەرەستەی خاوی چەکی کیمیایی، بەشی توێژینەوە و پێشخستن، تاقیگە بۆ بەرفراوانکردنی بەرهەم، شوێنی عەمبارکردنی چەک و تەقەمەنی و کیمیایی، ئاسایشێکی بەهێز و سیستەمێکی بەرگریی ئاسمانی پاراستوویەتی. ساڵی ١٩٨٥ بەشەکانی فەلوجە ١و٢و٣ی بۆ دروستکرا. چەندین کارگە لەم دامەزراوەیە بۆ پەرەپێدانی پرۆگرامی چەکی کیمیایی لەکاردابوون. لەوانە:ئیبن حەییان ١بۆ گازی خەردەل، موعتەسەم ٤بۆکاری تەکنیکی و بە کارهێنانی ئامێرەکان، مالک بۆ بەرهەمهێنانی تابوون، هیبەرجەر ١ و ٢ و٣یان موعتەسم ١، کە ساڵانی ١٩٨٤ بۆ ١٩٨٧ ڕۆژانە ٥٠٠کغم سارین و سایکلۆسارینی بەرهەمهێناوە، ژووری هەناسەهەڵکێشان، چوار کارگەی تری H١-H٤، چەند کارگەیەکی تری وەک ئەحمەد، محەممەد، مالک و زیا و..هتد، کە کۆمپانیای هیبەرجەری ئەڵمانی و کاراکۆلب کەرەستەیان بۆ دابینکردوون، کە دواتر گازە بەرهەم هاتووەکانی ئەم دامەزراوەیە لە ١٦ی ٣ی ١٩٨٨ هەڵەبجەی پێ گازباران کراوە.
سەرچاوەکان:
- بەرپرسیارێتیی کۆمپانیا کاریگەرەکان سەبارەت هێرشەکیمیاییەکانی سەدام حوسێن، عەدنان کۆچەر، چاپی یەکەم، چاپخانەی بینایی، ٢٠١٦، ل٣٥-٣٧.
- هەڵەبجە لەبەرامبەر ژەهری مەرگدا، بەکر حەمەصدیق، چاپی یەکەم، چاپخانەی ئاسمانن، هەولێر، ٢٠٢٣، ل٥٧٧ -٥٨٢.
ئامادەکردنی: هومایون ساحیب کەریم