زانستی پزيشکی کوردستان
ڕێکخراوێکی سەربەخۆی ناحکومییە. ساڵی ٢٠١٧ دامەزراوە، لەلایەن (ئەحسەن حەميد جەمال، کوردستان حەميد جەمال - حەميد جەمال محەممەد) لە بواری زانستی پزیشکی و کەرتی تەندروستی و هاوکاری مرۆییدا کاردەکات. (ئەحسەن حەميد جەمال) سەرۆکی ڕێکخراوەکەیە، ئۆفیس سەرەکیی ڕێکخراوەکە لە پارێزگای هەڵەبجەیە و لقی لە پارێزگاکانی سلێمانی، هەولێر، دهۆک، ئیدارەسەربەخۆکانی گەرمیان، ڕاپەڕین و زاخۆ هەیە. لە فەرمانگەی ڕێکخراوە ناحکومییەکان بە نوسراوی ژمارە (٣٧٤٤) لە ١٨ى ٩ى ٢٠١٧) تۆمارکراوە. ئامانجی ڕێکخراوەکە بریتییە لە کارکردن لەسەر بەرزکردنەوەی ئاستی زانستیی پزیشکی و ڕۆشبیرکردنی هەموو تاکێکی کۆمەڵگا بە زانستی پزیشکی، هەروەها داکۆکیکردن لە مافی نەخۆش و پزیشکان و کارمەندی تەندروستی، ئۆفیسی سەرەکی ڕێکخراوەکە کەوتووەتە پارێزگای هەڵەبجە، بەرامبەر مزگەوتی نور، تەنیشت فەرمانگەی پاسپۆرتی هەڵەبجە.
ژیوای
ڕێکخراویکی ناحکومییە بۆ کلتور و ڕۆشنبیری بە گشتی و هەورامان بەتایبەتی، کاردەکات. ئۆفیسی سەرەکی لە هەڵەبجەیە و کەوتوەتە گەڕەکی کانیقوڵکە، خوار بازاڕی مریشکفرۆشەکان. ساڵی ٢٠١٩دامەزراوە. دەستەی دامەزراندنی کاروان حسن حسێن، وەرزێر جمال محمد، گوڵی حەمە ڕەئوف احمد، بوون. بە ژمارە ٥١٥٨ لە ١٣ی١ی ٢٠٢١ تۆمارکراوە. یەکەم سەرۆکی کاروان حەسەن حسێن بووە. جێگری سەرۆک، جهاد سابر شریف، کارگێڕی و دارایی چیلەر بەهمەن وڵوخان، پڕۆژەکان، یادگار ڕووف محمەد، پەیوەندییەکان، وەرزێر جمال محەممەد. بیناکەیان کرێیە و خانووی هاوڵاتییە، لە سێ ژوور دروستکراوەتەوە، بودجەی دیاریکراویان نییە. کاردەکەن بۆ برەودان بە شێوەزاری هەورامی و ئەدەب و کلتوری هەورامان و بڵاوکردنەوە و چاپکردنی کتێب و سازدانی کۆڕ و پانێل.
سەروەری هەڵەبجە
ڕێکخراوێکی سەربەخۆی ناحکومییە لە ٢٠١٤ و لەلایەن (ئیقباڵ غەفار ئەمين، پەروین یارئەحمەد مەجید، سۆران محمەد ڕەشید)ەوە دامەزراوە. لە بواری مرۆیی و خێرخوازیدا کاردەکەن. (ئیقباڵ غەفار ئەمين) سەرۆکی ڕێکخراوەکەیە، لە فەرمانگەی ڕێکخراوە ناحکومییەکان بە نوسراوی ژمارە ١٨٤٧ لە ١٦ى ٣ى ٢٠١٤ تۆمارکراوە. ئامانجی ڕێکخراوەکە بریتییە لە خزمەتکردنی کۆمەڵگا و هەوڵدان بۆ کەمکردنەوەی هەژاری و بەرەوپێشبردنی کۆمەڵگا لەڕوی مەدەنیەتەوە، خزمەتکردنی سەرجەم چین و توێژەکانی کۆمەڵگا بەبێ جیاوازیی بیروڕا و ئایدیا و مەزهەب، ئۆفیسیان کەوتووەتە پارێزگای هەڵەبجە، گەڕەکی شەهیدان، تەنیشت مزگەوتی عوسمان کوڕى عەفان.
سەکۆی هاودەنگیی ڕێکخراوەکانی هەڵەبجە
ساڵی ٢٠٢٢ لەلایەن چەند ڕێکخراوێکی کۆمەڵگەی مەدەنی (NGO) لە پارێزگای هەڵەبجە دامەزراوە، لە بواری گەشەپێدانی کاری ڕێکخراوەیی و کۆمەڵگەی مەدەنیدا کاردەکەن. (قەیسەر ڕەحمان ئەحمەد) سەرۆکی ڕێکخراوەکەیە، ئامانجی ئەم ڕێکخراوە، گەشەپێدانى کۆمەڵگایە لە بوارى مەدەنى، کۆمەڵايەتى، پاراستنى ژينگە و ئابورىدا، گەشەپێدانى کارى ڕێکخراوەيى و بەتايبەتى ڕێکخراوەکانی کۆمەڵگاى مەدەنی، کارکردن بۆ چەسپاندنی بنەماکانی کۆمەڵگەى مەدەنى، مافی مرۆڤ و ژينگە.
سپی
ڕێکخراوێکی ناحکومییە، بۆ ناوچە کیمیابارانکراوەکانی کوردستان، ساڵی ٢٠٠٩ ڕاگەیەنراوە. ئامانجی پەیوەندی دروستکردنە لە نێوان خەڵکی ناوچە کیمیابارانکراوەکانی (هەڵەبجە، سێوسێنان، گۆپتەپە، گەرەوانان، دۆڵی جافایەتی، شێخ وەسانان، بالیسان) و ئەنجامدانی پڕۆژەکانی لەو ناوچانە. لۆگۆکەی دەمامکێکی کیمیایی و سێوێکی سوورە وەک ئاماژەی کیمیاباران. چەند چالاکییەکی گرنگی ئەنجامداوە، لەوانە: ١٦ی ٣ی ٢٠٠٩ گردبوونەوە لەبەردەم قونسوڵخانەی ئەڵمانیا، کە بووە هۆی ئەوەی پرسی کیمیاباران لەوەزارەتی دەرەوەی ئەڵمانیا گرنگی پێبدرێت. پرۆژەی توێژینەوەیەکی زانستی ژینگەی ناوچە کیمیابارانکراوەکان بە هاوکاری گرینکۆز و نەتەوە یەکگرتووەکان. هاوکار و شەریکی ڕێکخراوی وادی ئەڵمانی و گرینکۆزی جیهانی لەسویسرا. لە ٢٤ی ١ی ٢٠١٣ لە کۆبونەوەی گشتی ئەندامانیدا، هەڵبژاردنی سەرۆک و ڕێکخەر و دەستەی ڕێکخراوەکەی ئەنجامداوە.
شاڕێ بۆ پەرەپێدانی تاک
ڕێکخراوێکی سەربەخۆی ناحکومییە، ساڵی ٢٠٢١ لەلایەن (یاسین ئەحمەد عەبدولڕەحیم، نزار کەمال، بەهرە سەیفەدین ... هتد) دامەزراوە. لە بواری هۆشیاری و پەرەپێداندا کاردەکەن. (یاسین ئەحمەد عەبدولڕەحیم) سەرۆکی ڕێکخراوەکەیە، لە فەرمانگەی ڕێکخراوە ناحکومییەکان بە نوسراوی ژمارەی (٥٤٥٧) لە ١٦ى ١ى ٢٠٢١ تۆمارکراوە. ئامانجی ڕێکخراوەکە پەرەپێدان و گەشەپێدانی ڕۆشنبیریى تاکە لە بواری یاسایى و تەندروستى و زانستى کۆمەڵایەتى، پتەوکردنى گیانى پێکەوەژیان بە میتۆد و بیرکردنەوەى دروست و سەردەمیانە.