دیوانی پارێزگای هەڵەبجە
دواین نوێکردنەوە: 2026-04-07
بە فەرمانی هەرێمیی ژمارە ١٩ لە ١٦ی ٣ی ٢٠١٤ و پاڵپشت بە یاسای ژمارە ١ی ساڵی ٢٠١٥، دیوانی پارێزگا لە هەڵەبجە کراوەتەوە. لە ١ی ٦ی ٢٠١٥ (عەبدوڵڵا محەممەد عەبدول محەممەد) وەک یەکەم پارێزگار و (عەلى عوسمان عەلى) وەک جێگرى پارێزگار بۆ کاروبارى کارگێڕى و (کاوە عەلی کەریم) وەک جێگرى پارێزگار بۆ کاروبارى خۆجێیەتى دەستبەکاربوون. دواتر علی عوسمان بە وەکالەت پارێزگار بووە هەتا ٨ی ١٠ی ٢٠١٨، (ئازاد تۆفیق) وەک پارێزگار و لە ٨ی ٨ی ٢٠٢١ (شاهین حەمەڕەزا حەمەکەریم)، وەک جێگرى پارێزگار بۆ کاروبارى کارگێڕى دەستبەکاربوون. بە گوێرەى ئامارەکانی دیوانی پارێزگای هەڵەبجە، فەرمانگەکە سەر بە وەزارەتی ناوخۆیە و لە: پارێزگار، دوو جێگر، یەک نوسینگە و ١٠ بەرێوەبەرایەتى، چوار بەش و ١٩ هۆبە پێکهاتووە. هەتا ئێستا ئەنجوومەنی پارێزگای هەڵەبجە پێکنەهێنراوە. دیوانی پارێزگای هەڵەبجە خاوەنی بینای تایبەت بە خۆی نییە. لە ئێستادا تەنها ٧٠ فەرمانبەری میلاکی هەیە، کە ٣٨یان لە ڕەگەزی نێر و ٢٨ فەرمانبەری لە ڕەگەزی مێیە، هەروەها یەک فەرمانبەری گرێبەست لە ڕەگەزی نێر و ٢٣ فەرمانبەری خۆبەخشیان هەیە، کە هەشت لەوانە لە ڕەگەزی نێر و ١٥ لە ڕەگەزی مێیە. کاری ئەم فەرمانگەکە بریتییە لە ڕاییکردنی کاروباری هاوڵاتیان و ئەو نوسراو و فەرمانانەى، کە لە وەزارەتەوە دەردەچێت و ئاگادارى گشت فەرمانگەکانى سەر بە سنورى کارگێڕیى دەسەڵاتى خۆى دەکات.
سەرچاوەکان:
- داتا و زانیاری لە بەرێوەبەرایەتیى پلاندانان و بەدواداچوون، هۆبەی ئامارو پلان، دیوانی پارێزگای هەڵەبجە، ٨ی ٢ی ٢٠٢٣.
- یاسای ژمارە ١ی ساڵی ٢٠١٥ یاسای بە پارێزگاکردنی هەڵەبجە.
ئامادەکردنی: جەوهەر عەزیز ئەحمەد