ئامادەیی مەهابادی ئێوارانی کچان
دواین نوێکردنەوە: 2026-07-12
یەکەم ئامادەیی ئێوارانە لە شاری هەڵەبجە، گەڕانەوەی ئاوارەکانی پاش کیمیاباران لە وڵاتی ئێران هەتا ساڵی ٢٠٠٥ و زۆریی ژمارەی ئەو خوێندکارە کچانەی، کە بە بۆنەی ئاوارەیی و شەڕ و شۆڕ و بارودۆخی خراپی ناوچەکەوە لە خوێندن دابڕابوون و هەبوونی ژمارەیەکی تر لەو فەرمانبەرە ئافرەتانەی، کە خواستی بەدەستهێنانی بڕوانامەیان هەبوو، هۆکاری کردنەوەی بوون. بە دەستپێشخەری و داواکاری خانمە چالاکوان حەمیدە جەمال محمد ساڵی ٢٠٠٦ لە بینای قوتابخانەی حەمدون یەکەم وانەی تێداخوێنراو هەر خۆیشی ژمارەیەک مامۆستا و پێداویستییەکانی قوتابخانەکەی دابینکردووە و داواکاریی قوتابخانەکەی گەیاندووەتە بەڕێوەبەری پەروەردەی هەڵەبجە. سەرەتا ناوی ناوەندیی مەهابادی ئێوارانی کچان بووە. دواتر بووە بە دواناوەندی و ساڵی ٢٠١٠ بووەتە ئامادەیی. ئیراد مەنوچەر سان ئەحمەد، تا ساڵی ٢٠١١ یەکەم بەڕێوەبەری بووە و دوای ئەو سروە عبدالله محمد بۆ ماوەی سێ ساڵ بەردەوام بووە پاشان ئامینە أحمد قازی تاساڵی ٢٠١٧. بیناکەیان لە حەمدون و دواتر قوتابخانەی شاهۆ و دوای دوو ساڵ گواستراوەتەوە بۆ بینای ئامادەیی هەڵەبجەی کچان و دواتر قوتابخانەی بورهان و کانی عاشقان و لە ساڵی خوێندنی ٢٠٢٤- ٢٠٢٥یشدا لە بینای ئامادەیی باڵامبۆی کوڕان درێژە بە خزمەتی دەدات و نەرمین فرج حامد بەڕێوەبەرە. ٢کارگوزار و ٢ نوسەر و ٢١٤ قوتابی هەیە.
سەرچاوەکان:
- سەردانی ئامادەکار(پێشەوا اسعد) بۆ قوتابخانەی ناوبراو، ڕێکەوتی (٢٩/ ١/ ٢٠٢٥).
- چاوپێکەوتنی ئامادەکار(پێشەوا اسعد) لەگەڵ (م. نەرمین فەرەج)، لەدایکبووی(١٩٧٩)، بڕوانامە (بەکالۆریۆس) پیشە(مامۆستا)، ڕێکەوتی (٢٩/ ١/ ٢٠٢٥) لە قوتابخانەی ناوبراو.
- گفتوگۆی ئامادەکار(پێشەوا أسعد) لەگەڵ(م. ئیراد مەنوچەر)، لەدایکبووی (١٩٧٤)، بڕوانامە(بەکالۆریۆس) پیشە(سەرپەرشتیاری پەروەردەیی)، ڕێکەوتی(٢١/ ٢/ ٢٠٢٥)، پەیوەندی تەلەفۆنی.
- گفتوگۆی ئامادەکار(پێشەوا أسعد) لەگەڵ(حەمیدە جەمال)، لەدایکبووی (١٩٨١)، بڕوانامە(دبلۆم)، پیشە(فەرمانبەر) ڕێکەوتی(٢٠/ ٢/ ٢٠٢٥)، پەیوەندی تەلەفۆنی.
ئامادەکردنی: پێشەوا ئەسعەد خوارەحم