عوسمانى کوڕى عەفان ١
دواین نوێکردنەوە: 2026-04-07
کەوتووەتە گەڕەکى (شەهيدان) له ناوشاری هەڵەبجە. بەهۆى نزيکیى لە گۆڕستانى شەهيدانەوە بە مزگەوتى (شەهيدان)يش دەناسرێت. زەوييەکەى موڵکى شێخ ئەنوەرى شێخ سوێڵەى عەبابەيلێی بووە، بە پارەيەکى کەم فرۆشتوويەتى بە خێرخوازان بۆ دروستکردنى مزگەوت، ئەوەى زۆر ڕۆڵى لەو مامەڵە و بە مزگەوت کردنەدا هەبووه، هەردوو کەسايەتى حاجى حەمەتۆفيقى حاجى عارفى عەبابەيلێ و عومەرى حاجى فەرەجى عەبابەيلێيى بوون، ئەوان سەرپەرشتى کارەکەيان کردووە. مزگەوتەکە ساڵى ١٩٨١ لەسەر ئەرکى خێرخوازان دروستکراوە. لە کیمیاباراندا نەڕووخاوه، بەڵام زيانى بەرکەوتووە. مزگەوتەکە يەک نهۆم بووە و سێ دەروازەى هەبووە، دوو هۆڵى پرسەى بۆ پياوان و ژنان هەبووە، منارەى هەبووه و مەدرەسەى تێدايە. نزيکەى دوو ساڵە مزگەوتەکە تێکدراوە و لەسەر ئەرکى خێرخوازان بەشێوازێکى زۆر گەورە و فراوان و بە دوو نهۆم دروستدەکرێتەوە، لەئێستادا کارى تێدا دەکرێت. چەند خانويەکى تەنيشتى مزگەوتى بۆ کڕدراوە و خراوەتە سەر مزگەوت، هۆڵ و منارە و گومەزى هەيە. شوێنى مەدرەسەى بەجيا بۆ دروستکراوە. لە سەرەتاى دروستکردنييەوە هەتاکو چەند ساڵێک بەر لە ئێستا مامۆستا شێخ محەممەدى شێخ باباڕەسوڵ پێشنوێژى مزگەوتەکە بووە، دواى مامۆستا شێخ محەممەد، مامۆستا مەلا خاليد حاجى حەمەتۆفيقى عەبابەيلێ بووە بە پێشنوێژ و وتاربێژى مزگەوتەکه.
سەرچاوەکان:
- سەردانیکردنی ئامادەکار بۆ مزگەوتەکە، ٥ی ١٢ی ٢٠٢٣.
- چاوپێکەوتنی ئامادەکار لەگەڵ (حاجى حسين غەريب عەبابەيلێيى)، لە ٦ی ١٢ی ٢٠٢٢، لە هەڵەبجە.
ئامادەکردنی: د. عادل سدیق عەلی