شێخ عەبدوڵڵای خەرپانەیی
دواین نوێکردنەوە: 2026-04-08
کەوتووەتە گوندی (خەرپانی) سەر بە ناحیەی (بیارە). مێژووەکەی دەگەڕێتەوە بۆ سەردەمی باپیری زانای کورد (شێخ عەبدوڵڵای خەرپانی)، کە دەکاتە (شێخ محەممەد کۆسە). شێخ عەبدوڵڵا، لە دەوروبەری ساڵی ١٧٤٢ لەدایکبووە. مزگەوتەکە لە سەردەمی ئەودا بووەتە پێگەیەکی گەورەی زانستی و مەعریفەت و ڕۆشنبیری، عەوداڵانی زانست بۆ خوێندن ڕوویان لە خەرپانی کردووە. لەلایەن میرەکانی بابانەوە چەند شوێنێکی وەک چەمی بیارە و تەوێڵە و جۆگەى دەلێن و گوندی موانی شارەزووری بۆ وەقف کراوە. چەندین زانا و شاعیر و ڕۆشنبیر و پایەرزی پێگەیاندوە، وەک مەولانا خالیدی نەقشەبەندی، مەولەوی، نالی، موفتی زەهاوی(موفتی عێراق) و مەلایاسین تەوێڵەیی. ساڵی ١٨٣٨ کۆچیدواییکردووە. ساڵی ١٩٦٤ جارێکی تر مزگەوتەکە دروستکراوەتەوە. ساڵی ١٩٧٨ لە کاتی ڕاگواستنی گوندەکاندا لەلایەن حکومەتی عێراقەوە ڕوخێنراوە. ساڵی ٢٠١٠ لەلایەن (شێخ محەممەد کوڕی شێخ جەعفەری خەرپانی)ی نەوەی شێخ عەبدوڵڵای خەرپانییەوە لەسەر ڕووبەری (٥٠٠م)٢یە دروستکراوەتەوە.
سەرچاوەکان:
- بنەماڵەی زانیاران، چاپی یەکەم، مەلا عەبدولکەریمی مودەڕیس، کتێبی کانی، سنە، ١٣٨٩، ل١٤٤.
- گۆڤاری (پەیامی ڕاستی)، شێخ عەبدوڵای خەرپانی، د. ئاراس مەحمود ساڵح، ژمارە (١١٦ – ١١٧) ی هاوین و پایزی ٢٠٢٠، ل٣٧.
- سەردانی مەیدانیی ئامادەکار بۆ مزگەوتەکە، لە ٢ی ١١ی ٢٠٢٢.
ئامادەکردنی: جەوهەر عەزیز ئەحمەد