حاجی مامۆستا مەلاساحێب
دواین نوێکردنەوە: 2026-04-15
زانا و مودەڕیس و وتاربێژ. ساڵی ١٨٩٨ لە تەوێڵە لەدایکبووە. لەلای مەلا عبدالکریمی مودەڕیس خوێندوویەتی. بۆخوێندن دەچێتە هەڵەبجە و سلێمانی و قەرەداغ، لای زانای پایە بەرز شێخ نەجیب ئیجازە وەردەگرێت. سەرەتا لە سەعدیە و دواتر لە خانەقای مەولانا لە سلێمانی پێشنوێژ و وتاربێژ بووە. ساڵی ١٩٣٣ دەچێتەوە تەوێڵە و بۆ ماوەی ٤٠ ساڵ پیشنوێژ و وتاربێژ بووە لە تەوێڵە. لە سەردەمی مودەڕیسیی ئەودا خوێندنگای تەوێڵە برەوی زانستی زیاتر دەبێت و ژیان و گوزەرانی فەقێ و خوێندن لەسەردەمیدا زۆر باش دەبێت. لە مامۆستا پایەبەرزەکانی وەک (ئەحمەدی موفتیزادە، مەلا عەبدوڵلای هەجیج، مەلا قادری قادری، د. مەلا مستەفای زەڵمی و... . هتد). مۆڵەتی بە چەندین مامۆستا و زانا بەخشیوە. مامۆستا ساڵی ١٩٧١ خۆی خانەنشین دەکات و لە هەڵەبجە نیشتەجێدەبێت. لە ٩ی ٧ی ١٩٧٧ کۆچیدواییدەکات و دەبرێتەوە تەوێڵە و لە گۆڕستانی باوا سەرهەنگ بەخاکسپێرراوە.
سەرچاوەکان:
- کاروانی ژیانم، موستەفا ئیبراهیم زەڵمی، بەرگی یەکەم، چاپی یەکەم، ٢٠١٤، ل٥٩-٦٣.
- سەربوردێکی هەورامان و سەردانێکی تەوێڵە، عبدالرزاق عبدالرحمن محمد، چاپی یەکەم، تاران، ٢٠٠٥، ل٥٩٨.
ئامادەکردنی: هومایون ساحیب کەریم