ميرزا حەسەن نەورۆڵى
دواین نوێکردنەوە: 2026-04-08
کەسایەتیی کۆمەڵایەتی و سەرۆک هۆزی نەورۆڵییە. ناوی (ميرزا حەسن محەممەد عەبدولمحەممەد)ە. ساڵى ١٩٢٠ لە گوندى (خێڵى حەمە) لە شارەزوور لەدايکبووە. خوێندنى لە (حجرە) خوێندووە و لەبەر زيرەکى لە لايەن شێخانى بيارەوە نازناوى (ميرزا)ى پێدراوە. پێنج جار ژیانی هاوسەریی پێکهێناوە و خاوەنی نۆ منداڵە. جگە زمانى دايک، عەرەبى و فارسى زانيوە. لە تافى لاويدا کراوە بە سەرۆک هۆزى نەورۆڵى و لە خەمى هەژاراندا بووە. لە چارەسەرکردنى زۆربەى کێشەکانى شارەزوور و سلێمانى و گەرمياندا ڕۆڵی هەبووە. کەسێکی قسەخۆش و خانەدان بووە. بەهۆى هەڵوێستەکانى چەندجار توشى گرفت بووە و ماڵى وێران کراوە و سێ جار لە ساڵەکانى (١٩٦٣، ١٩٦٤، ١٩٨٧) ئاوارەى ئێران بووە. لەتەمەنى ٦٩ ساڵيدا لە وڵاتى ئێران کۆچیدواییکردووە لەسەر وەسيەتى خۆى لە گۆڕستانى (وەيسى قەرەنى) بەخاکسپێرراوە.
سەرچاوەکان:
- چاوپێکەوتنی ئامادەکار لەگەڵ (تەحسين ميرزا حەسەن)، لەدایکبوو: ١٩٦٣، بڕوانامە: دواناوەندى، سەرۆک عەشيرەتى نەورۆڵى، لە ٢٠ی ٢ی ٢٠٢٣.
ئامادەکردنی: نزار کەمال حەمەئەمين