ئاشەکانی گوندی سازان
دواین نوێکردنەوە: 2026-04-08
١-شێخ سەعید: ئاشى ئاوە. کەوتووەتە دامێنی ئاشى (شێخ عارف) لە گوندی (سازان). خاوەنەکەی (شێخ سەعید) بووە دواتر بووە بە ئاشی کاکە شێخ کوڕی شێخ سەعید. ئاشێکی کۆن بووە و نۆژەنکراوەتەوە. هەتا ڕاگواستنی گوندەکان لە ساڵی ١٩٧٨ کاریکردووە. لە گوندەکانی نزیکی سازان وەک لمە و پێگە و کۆساوا و بۆین، بارئاشیان لێ هاڕیوە. بەئاوی سەروەزەن و چاوگ ئیشیکردووە. ئاشەوانی خۆی هەبووە. شوێنەواری ئاشەکە و خەزانی ئاوەکەی و بەرداشەکەی هەر ماون.
٢-شێخ سەلام : ئاشى ئاوە. کەوتووەتە (دەراش)ی گوندی (سازان). مێژووەکەی بۆ نیوەی یەکەمی سەدەی بیست دەگەڕێتەوە. لە ئێستادا شوێنەواری نەماوە و ئاشتی تر لە شوێنی دانراوە.
٣-شێخ عارف: ئاشى ئاوە. کەوتووەتە خوار ئاشی(سەرچاوگ). بەناوی خاوەنەکەی (شێخ عارف)ـەوە ناونراوە. هەتا ساڵی ١٩٧٨ و ڕاگواستنی گوندەکە کاریکردووە.
٤- شێخ کەریم: ئاشى ئاوییە. کەوتووەتە سەر چاوگی گوندی (سازان). بە ناوی خاوەنەکەیەوە (شێخ کەریم)ـەوە ناونراوە. دواتر کەوتووەتە دەست شێخ محەمەدی کوڕی بۆیە بە ناوی ئەویشەوە ناسراوە. بە ئاوی سەرچاوگ کاریکردووە. هەتا ساڵی ١٩٧٨ و ڕاگواستنی گوندەکە کاریکردووە.
سەرچاوەکان:
- چاوپێکەوتنی ئامادەکار لەگەڵ (نەوزاد شێخ محەممەد ساڵح شێخ فەرج)، لەدایکبوو: ١٩٦٧، بڕوانامە: دبلۆم، پیشە: یاریدەدەری پزیشک، لە ٢٤ی ٩ی ٢٠٢٣، لە هەڵەبجە.
- لە ئامێزی سازاندا، ئامادەکردن و نوسین: صادق شێخ عوسمان سازانی، چاپی یەکەم، چاپخانەی پیرەمێرد، سلێمانی، ٢٠١٥، ل٧١.
ئامادەکردنی: هومایون ساحیب کەریم