ئاشەکانی تەوێڵە
دواین نوێکردنەوە: 2026-04-07
١-خاڵێ: لە شارەدێی (تەوێڵە)، کەوتووەتە پشتی حەوزەوە. بەئاو گەڕاوە. خاوەنەکەی مەلا حەیبوڵڵا بووە، بەڵام بەناوی (خاڵێ)ی ئاشەوانەوە ناسراوە. دواتر بووە بە ئاشی مەلا فائقی کوڕی مەلا حەبیبوڵڵا و هەتا ساڵی ١٩٨١ لەکاردا بووە. ئێستە شوێنەکەی کراوە بە دوکان.
٢-خانەقا: بەئاو گەڕاوە. لە نزیک خانەقا بووە. لە سەردەمی شێخ ئەحمەددا کراوە بە ئاشی مەکینە. یەکەمین ئاشی مەکینە بووە. باشتر و خێراتر و ئاسانتر کاریکردووە. نالە ئاشەوان، ئاشەوانی بووە. هەتا ساڵی ١٩٨١ لەکاردا بووە.
٣-خەرتاو: کەوتووەتە شارەدێی (تەوێڵە). بەئاو گەڕاوە. لە خوار خانەقای تەوێڵەوە بووە، لە دەستی ڕاست و کەوتووەتە بەردەم جۆگەی سۆفییەوە.
٤-سەی فەتحە: کەوتووەتە شارەدێی (تەوێڵە). بەئاو گەڕاوە. هی شێخی بەهادین بووە و داویەتی بە خاتوو عومەرێی خوشکی و دواتر بووە بە ئاشی سەی فەتحەی خوشکەزای.
٥-ئاشەبەرزە و ئاشەنزمە: دوو ئاشی ئاویی شێخ بوون، کەوتوونەتە شارەدێی تەوێڵە، یەکیان لەسەرەوە بووە و ئەویتر لە خواری، شوێنەکەیان خانوی حاجی مستەفای حاجی ساڵحە. ژن و پیاوێک ئاشەوانی بوون بە ناوی(ئامان و ئەحمەد) ماوەیەکیش عەبدیلە و ئەمنەی لەسەر بوون.
سەرچاوەکان:
- سەربوردێکی هەورامان و سەردانێکی تەوێڵە، عبدالرزاق عبدالرحمان محمد، چاپی یەکەم، تاران، ٢٠٠٥، ل٥١٠.
- چاوپێکەوتنی ئامادەکار لە گەڵ.سەرتیپ ئادەم ئیسماعیل مەلا بەکر. لە دایکبووی ١٩٥٧. دبلۆم. خانەنشین. ١٢ی ١ی ٢٠٢٤تەوێڵە.
ئامادەکردنی: هومایون ساحیب کەریم