هانە سووره (گوند)
دواین نوێکردنەوە: 2026-04-08
کەوتووەتە سنوری ناحیەی (سیروان) و بە دووریی نزیکەی حەوت کیلۆمەتر و نیو لە شاری هەڵەبجەوە دوورە. گۆڕستانی (ملەی مزیار) کەوتووەتە ئەم گوندەوە، کە لە شوێنێکی جوگرافیی بەرز و ستراتیجی ناوچەی نەورۆڵیدایە. لە خۆرهەڵاتەوە لەگەڵ گوندی تریفە و لە باکوری خۆرئاواوە لەگەڵ گوندی پریسی سەروو و لە باشورەوە لەگەڵ گوندی گوندە و لە خۆرئاواوە لەگەڵ گوندی سەراو هاوسنورە. مەزاری زۆرێک لە کەسایەتییە ناسراوەکانی عەشیرەتی نەوڕۆڵی تێدایه، وەک (ساداتی هانەسوورە و عەبدوڵا محەممەد خواکەرەمی گەورەی نەوڕۆڵی و ئەحمەد پریسی شاعیر). لە سەرژمێریی ساڵی ١٩٥٧دا ژمارەی دانیشتوانەکەی ٢٤٥ کەس بووە. لە ئێستادا ١٤ تەنها کەسە. ساڵی ١٩٧٨دا بارکراوە و پێش ئەو کاتە ٥٣ ماڵی تێدا بووە. ناوی گوندەکە لە بنەڕەتدا هەورامییە و بە مانای کانییە سوورە دێت، کە کەوتووەتە ناوەڕاستی گوندەکەوە، ڕووەو سەراوە و زەوییەکەی سوورمەنە. ڕووبەرەکەی ١٨٦٦ دۆنمە. لەم گوندەدا چەندین کانی و کارێز هەن، وەک (کانی سەید، کارێزی سەید، کانی حاجی عەبدوڵا، کانی حەمل، کانی موسەلێ، حەوکانی). دانیشتوانی گوندی هانەسوورە بە ئاژەڵداری و وشکەدانەوە خەریکبوون و سودیان لە بەروبوومی سروشتی چیای باڵامبۆ وەرگرتووە. زەوییەکانی سەر بە کەرتی کشتوکاڵیی ژمارە ٣٣ی هانەسوورەیە.
سەرچاوەکان:
- هانەسوورە(بنەماڵەی سەیدی هانەسوورە لە مێژوودا)، مەلا عەبدوللەتیف بامۆکی چاپى يەکەم، چاپخانەى گەنج، سلێمانى، ٢٠١٠ ل٢٧.
- چاوپێکەوتنی ئامادەکار لەگەڵ (سەید حەکیم سید نەجیب)، ١٩٥٧، ئامادەیی، خانەنشین، لە ١٦ی ١٠ی ٢٠٢٢.
- گوندەکانی باشوری کورستان لە سەرژمێری دانیشتوانی عێراقدا ١٩٥٧، دکتۆر عبداللە غفور، بەرگی دووەم، چاپی دووەم، چاپخانەی دەزگای ئاراس، هەولێر، ٢٠٠٥، ل١٥٢.
ئامادەکردنی: باخان خالید عەبدولقادر