گۆڕستانەکانی گوندی
دواین نوێکردنەوە: 2026-04-14
١- بابلەگورز یان بابا گورزین: کەوتووەتە نزیک کانیی (کەڕەجاڵ) لەسەرووی گوندی زەڵم. شوێنەکەی دیاریکراوە و سوخنی هەیە. بەناوی مەزاری باباگورزینەوە ناونراوە. لە بیروباوەڕی خەڵکی ناوچەکەدا هاتووە، کە خەڵک بۆ پاراستنی شتومەکەکانیان پەنایان بۆ بردووە، یان کە چوونەتە هەوار و شاخ، شتەکانیان لەوێ داناوە، بەو باوەڕەی کە چاودێریدەکات و دەپارێزرێت و نابرێت.
٢- پلە لەتەرە یان سەید جەواز: کەوتووەتە بەردەم ماڵەکانی گوندی زەڵم. گۆڕستانێکی دێرینە. بە ناوی مەزاری سەید جەوازەوە ناونراوە، کە نزیک گۆڕستانی تەپۆڵەیە.
٣- تەپۆڵە: گۆڕستان و شوێنەوارە. کەوتووەتە لاشانی کۆشکی کوڕ و بەرانبەریشی کۆشکی کچە، دەستە ڕاستی دۆڵی وشکەناوە و چەپی دۆڵی زەڵمە. شوێنەوارێکی دێرینە. ساڵی ١٩٧٢ وەک گۆڕستان، یەکەم مردووی لێ بەخاکسپێرراوە و نزیکەی ٢٠٠ گۆڕی لێیە. لە هەندێک سەرچاوەدا بە دێی زەنزەنە ناوی هاتووە. زەڵمییەکان بۆ شوێنی یارییە میللییەکان و کۆبوونەوەکان لە وەرزەکانی تردا لە تەپۆڵە کۆبوونەتەوە و هاوینانیش بۆ هەمان مەبەست و کات_بەسەربردن لێی کۆبوونەتەوە.
٤- دارو قیبلێ (داری قیبلە): بەرانبەر ماڵەکانی ئاوایی زەڵم، لەبەرزاییەکدایە. شوێنەوارێکی دێرینە. لە ئێستادا مردووی لێ بەخاکناسپیررێت. پێشتر دارێکی گەورەی لێ بووە و بەهۆی ئەوەی مزگەوتی گوندەکە ڕووی کردووەتە ئەم دارە، بە داری قیبلە ناسراوە.
سەرچاوەکان:
- چاوپێکەوتنی ئامادەکار لەگەڵ (محەممەد یاسین محەممەد ئەمین)، لەدایکبوو: ١٩٦٧، ئاستی خوێندن: ناوەندی، پیشە: خانەنشین، لە ٢٦ی ١ی ٢٠٢٤، لە خورماڵ.
- چاوپێکەوتنی ئامادەکار لەگەڵ (عەلی حاجی زەڵمی)، لەدایکبوو: ١٩٧٥، بڕوانامە: بەکالۆریۆس، لە ٣٦ی ١ی ٢٠٢٤، لە خورماڵ.
- گفتوگۆی ئامادەکار لەگەڵ (ئیبراهیم حاجی زەڵمی)، لەدایکبوو: ١٩٧٢، بڕوانامە: دکتۆرا، پیشە: مامۆستای زانکۆ، لە ٧ی ٢ی ٢٠٢٤.
ئامادەکردنی: هومایون ساحیب کەریم