حەمەوخان
دواین نوێکردنەوە: 2026-04-08
به دووریی (٥٠٠م) کەوتووەتە خۆرهەڵاتی گوندی (شیرەمەڕ)ی سەر به شارۆچکەی خورماڵ. لەکاتی خۆیدا و تا ساڵی ١٩٩٨ چەمێکی پڕ بێشه و دارودەوەن بووە. درێژییەکەی نزیکەی کیلۆمەتر و نیوێکە. لەسەر چاوگی گوندەکەوە درێژبووەتەوە تا جۆگەی وڵەوسێنان لە نزیکی ئاوایی حاجی حەمەومین. لە وشکەساڵییەکەی ساڵی ١٩٩٨دا زۆربەی دارودرەختەکانی وشکیانکردووە، بەڵام ئێستا تەنها له وەرزی بەهار و زستان ئاوی سەرڕێژی چاوگ دەچێتە ناویەوه، تا کۆتای بەهار ئاوێکی زۆری تێدایە. لەکاتی تاپۆکردنی زەوی بەسەر بەگزادەجافەکاندا خۆرهەڵاتی چەمەکە بەر داودبەگی حەمەسەعید بەگی وەسمان پاشای جاف کەوتووە و خۆرئاوای چەمەکە تا ڕووی گوندی شیرەمەڕ، بۆ حامید بەگی مەجید بەگی وەسمان پاشای جاف بووە. بەڵام ئێستا هەردوو خۆرهەڵات و خۆرئاوای چەمەکە لە سنوری گوندی شیرەمەڕدایە و خاوەندارێتیان بۆ جوتیارانی گوندەکە دەگەڕێتەوە. لە تۆمارە فەرمییەکاندا ناوی چەمەکە به (چەمی شیرەمەڕ) هاتووە، بەڵام لەناو دانیشتوانی گوندی شیرەمەڕدا بە چەمی حەمەوخان بەناوبانگه و ناولێنانەکەی بۆ کەسێک دەگەڕێتەوه، کە لە کۆتایی ساڵانی ١٨٩٠ەکاندا خاوەندارێتی ئەم چەمەی کردووە و دەکاتە باپیرەی حاجی ساڵحی گێڵەک و حاجی مەحموودی محەممەدی بارامی گردی قازی.
سەرچاوەکان:
- چاوپێکەوتنی ئامادەکار لەگەڵ مام (یونس عەبدولکەریم قادر)، لەدایکبوو: ١٩٤٧ ئاستی خوێندن: سەرەتای، پیشە:خانەنشین، لە ٢ی ٣ی ٢٠٢٤، لە شیرەمەڕ.
- چاوپێکەوتنی ئامادەکار لەگەڵ (موشیر حاجی ساڵح حەمەڕەحیم)، لەدایکبوو: ١٩٥٥، پیشە:جوتیار، لە ٩ی ٢ی ٢٠٢٤، لە گێڵەک.
- سەردانی مەیدانیی توێژەر بۆ شوێنەکە، لە ١٤ی ١ی ٢٠٢٤.
ئامادەکردنی: سەرچڵ یونس عەبدولکەریم