تەوێڵە
دواین نوێکردنەوە: 2026-04-07
لە سەرچاوەوە دوو لقە؛ لقی یەکەمیان لە چەمی زاوەر (دەرەو زاوەری)، کە گوندێکە و کەوتووەتە شاخی داڵانی هەورامانی لهۆنەوە، چەمی دووەمیان، کە چەمی (ئاوێسەرە) یان (دەرەو ئاوێسەری)، کە کانیاو و هاوینەهەوارێکی سروشتیی جوانە، سەرچاوە دەگرێت. هەردوو لقەکە چەند کانیاوی بنی شاخەکانیان تێدەڕژێت و لە ناو بازاڕی تەوێڵە یەکدەگرن و ئاوەڕۆی تەوێڵەیان دەچێتە سەر و چەمی خواروو دروستدەکەن. ئەویش چەندین کانی تێدەڕژێت و چەمی تەوێڵەی لێپێکدێت، بەرەو ئەوپەڕی خۆرئاوا دەکشێت، هەم جۆگەی لێ هەڵدەگیرێت، هەم کانی و ئاوی تێدەڕژێت. باخەکانی (خوارووی تەوێڵە، سۆسەکان، پالانیا، جاور، هاوار، هەوارەکۆن، گریانە) پشتیپێدەبەستن و دەڕژێتە ڕوباری سیروانەوە.
سەرچاوەکان:
- پەیامی هەورامان، هادی بەهمەنی، چاپی پێنجەم، ٢٠٢٠، ل ٢٤٤.
- سەربووردێکی هەورامان و سەردانێکی تەوێڵە، عبدالرزاق عەبدولڕەحمان محمد، تاران، ٢٠٠٥، ل٤٩٦.
- جوگرافیای هەورامان و دەرامەتە ئاوییەکانی، ڕێباز حەمەغەریب هەورامانی، چاپی یەکەم، سلێمانی، ٢٠١٧، ل١١٢.
ئامادەکردنی: کارزان عەدنان حەمەسەعید