بەڵخە
دواین نوێکردنەوە: 2026-04-08
کەوتووەتە سنوری ناحیەی (بیارە)، سەرچاوەکەی لە چیای(تەوەنێ) لەبەرزایی (١٩٩٤م) لەئاستی ڕووی دەریاوە دەستپێدەکات. ئاوی دۆڵەکانی (لاسەو زیتێ، هانە وەهارە، خوێڕسگە، ولێ) و کانیاوی(تەوەنێ) ی تێدەڕژێت و بەرەو خۆرئاوا ڕێڕەودەکات و بەنێو گوندی بەڵخەی سەرو و خواروو تێپەڕدەبێت تاوەکو دەگاتە دۆڵی(سۆڵێ) و لێرەدا ئاوی دۆڵەکانی(باواندەرە و سینەسەحاب و هەڕەسیاوی) تێدەڕژێت و پاشان چەمی مێشلەی تێدەڕژێت و بەرەو باشور ڕێدەکات و دەڕژێتە ناو چەمی تەوێڵەوە. درێژییەکەی نزیکەی پێنج کیلۆمەتر دەبێت. لەسەر چەمی بەڵخە جگە لە گوندەکە، چەند باخێکی زۆر دروستکراوە، کە پشت بەئاوی چەمەکە دەبەستن و کۆمەڵێک خزمەتگوزاریی گەشتوگوزاری تێدا بونیادنراوە.
سەرچاوەکان:
- قضاء هەڵەبجە دراسة فی الجغرافیة الأقلیمیة، عطا محمد علاءالدین، مطبعة تیشک، السلیمانیة، الطبعة الاولی، ٢٠٠٨، ص٩٥.
- تقییم جغرافی لاستخدمات الموارد المائیة فی حوض نهر زلم، محمد حمەصالح فارس الشهرزوری، رسالة ماجستیر، جامعة صلاح الدین، کلیة الاداب، ٢٠١٧، غیرمنشورة، ص١٥٥.
ئامادەکردنی: د. ڕێباز لوقمان مستەفا