جۆگە ئاودێرییەکانی گوندی خارگێلان
دواین نوێکردنەوە: 2026-04-14
ئەو جۆگانەن کە بەشێکی زۆری کەرتی کشتوکاڵی ٢٩ی خارگێلان پاراو دەکەن و بریتیین لە:
١- چنار: جۆگەیەکی سەرەکییە و بەناو خارگێڵاندا تێدەپەڕێت. نزیکەی چوار کیلۆمەتر درێژییەکەیەتی. دەچێتە زەوییەکانی ملەگا گڕە لەوبەری چەمی بیارە، کە لەو ئاستەدا پێیدەوترێت دەرەقوڵ.
٢- لارەجۆ: کەوتووەتە سەر چەمی بیارە و لە کانی هەزارگری و باخی موفتی درێژبووەتەوە. لە جۆگەی زەردەهاڵ جیا دەبێتەوە و بە بەردەمیدا بە ئاڕاستەی گوندی (خارگێڵان) دەڕوات. نزیکەی ٧٠ دۆنم باخ و ١٥٠ دۆنم زەوی بەراودەکات. نزیکەی دوو کیلۆمەتر درێژییەکەیەتی.
٣- مەمکەجۆ: بۆ هاوکاری لارە جۆگە دروستکراوە. هەندێکیش پێیدەڵێن (مەنگەجۆگە). بەشێکی زۆری زەوییەکانی کەرتی ٥٩ی بنجەی دڕە ئاودەدات. لە ڕابردوودا لەسەر ئەم دوو جۆگەیە چەند ئاشێکی ئاوی بونیانراون، وەک ئاشی (سەعەی فەرەج) و ئاشی (شێخ سادق).
٤- دوولەتان: لە چەمی دەرەقووڵی خارگێلانەوە درێژبووەتەوە بۆ زەوییەکانی قێخا حەمەحەسەن و زەوییەکانی تەپەسێلکان، تا دەگاتە خێڵی حەمە. نزیکەی شەش کیلۆمەتر درێژییەکەیەتی. ١٥ دۆنم زەوی ئاودێریدەکات. جۆگەی ٣سێ کیلۆمەتری مەولودەی لێ هەڵگیراوە بۆ پشتی هارە مەڕیاو بەرەو دەرەیاوی بەردەم خارگێڵان.
٥- هەسەنەجۆ: بە پشتی خارگێڵاندا تێدەپەڕێت، لە نێوان دێکۆن و خارگێڵاندا. نزیکەی پێنج کیلۆمەتر درێژییەکەیەتی. دەگاتە دێکۆن و خەڵکی ئەوێش سودیلێدەبینن.
سەرچاوەکان:
- چاوپێکەوتنی ئامادەکار لەگەڵ (فەیرۆز عیزەت حەمەیوسف)ی ئەنجومەنی گوندی (خارگێڵان)، لەدایکبوو: ١٩٥٥، ئاستی خوێندن: سەرەتایی، پیشە: جوتیار، لە ٤ی ٥ی ٢٠٢٤، لە خارگێلان.
- گفتوگۆی ئامادەکار لەگەڵ (موختار سەردار مستەفا)، لەدایکبوو: ١٩٦٧، بڕوانامە: بەکالۆریۆس، پیشە: فەرمانبەر، لە ٥ی ٥ی ٢٠٢٤.
- گفتوگۆی ئامادەکار لەگەڵ (ناسح ئەحمەد مەحموود)، لەدایکبوو: ١٩٦٦، بڕوانامە: ئامادەیی، پیشە: فەرمانبەر، لە ٥ی ٥ی ٢٠٢٤.
- چاوپێکەوتنی ئامادەکار لەگەڵ (هۆشمەند یار ئەحمەد بەگ)ی کەسایەتی کۆمەڵایەتی، لەدایکبوو: ١٩٥٤، پیشە: خانەنشین، لە ٢٨ی ٤ی ٢٠٢٣.
ئامادەکردنی: هومایون ساحیب کەریم