دارستانی گوڵان
دواین نوێکردنەوە: 2026-04-08
دارستانێکی دەستکردە. کەوتووەتە بەشی باشوری شاری هەڵەبجەوە. لە لایەن ڕژێمی پێشووی عێراقەوە بۆ مەبەستی دروستکردنی پشتێنەی سەوزایی بەدەوری شاردا دروستکراوە. سەرەتا ساڵی ١٩٧٢ دەستیپێکراوە. ڕوبەرەکەی نزیکەی ٦٥٢ دۆنم دەبێت. کەوتووەتە کەرتی کشتوکاڵی ژمارە ٢٦ی (باوەکۆچەک). تا سنوری گوندەکانی (حەسەن ئاوا و تریفە) درێژدەبێتەوە. بەسەر (چەمی باوەکۆچەک)دا دەڕوانێت و لە دوو ڕێگای سەرەکیەوە دەتوانرێت بەم دارستانە بگەین، یەکەمیان ڕێگای باوەکۆچەک و چاوگە دووەمیان ڕێگەی گوندی پریسە. دارستانەکە لەلایەن بەڕێوەبەرایەتیی دارستان و پاوانەوە سەرپەرشتیدەکرێت. لە ئێستادا تەنها پێنج کرێکاری بۆ دابینکراوە. کاریگەرییەکی گەورەی لەسەر خۆشکردنی ئاوهەوای ناوچەکە هەیە. وەک سەیرانگایەک و شوێنێک بۆ کات_بەسەربردن و ئاهەنگی خێزانی بەکاردەهێنرێت. بووەتە ژینگەیەکی لەبار بۆ چەندین باڵندەی کێوی و پاراستنیان. له ئێستادا ٩٨٠٠٠ دار لە جۆری داری سنەوبەر و زەیتون و سەرووی ستوونی و بڵاڵوک و چەقالە و بایەزى تێدايە. بە دوور نەبووە لە کاری تێکدەرانە. لە لایەن خەڵکانی نادیارەوە بەشێوەیەکی نابەرپرسانە دارە گەورەکانی هەڕەشەی بڕین و وشککردنیان لەسەربووە. ساڵی ٢٠١٩ بەدەستێکی نادیار توێکڵی پێنج لە دارە بەتەمەنەکانی هەڵکۆڵران. بەڵام لەلایەن شارەزایانی بەڕێوەبەرایەتیی کشتوکاڵی هەڵەبجەوە کاریان لەسەر کرا. لە بری ئەو دارانە چەندین پرۆسەی چاندنی نەمام و داری دیکە ئەنجامدرا.
سەرچاوەکان:
- چاوپێکەوتنی ئامادەکار لەگەڵ (محەممەد مەحموود نادر)ی لەدایکبووی ١٩٧١، پیشە: ئەندازیاری پێشکەوتوو لە بەڕێوەبەری دارستان و پاوانی هەڵەبجە، بڕوانامەی بەکالۆریۆس، لە ٢٦ی ١٢ی ٢٠٢٢.
ئامادەکردنی: کارزان عەدنان حەمەسەعید